උතුරු දුම්රිය මාර්ගයේ මහව සහ අනුරාධපුර අතර කොටස නවීකරණය කිරීමේදී ආබාධ සහිත පුද්ගලයන්ට දුම්රිය වේදිකාවට පිවිසීමට ප්‍රවේශ පහසුකම් සකස් නොකර ඉදිකර ඇති බවට චෝදනා කරමින්, ආබාධ සහිත කාන්තාවන්ගේ සංගමය මහාධිකරණය හමුවේ පවරා ඇති නඩුවට අදාළව විරෝධතා ලබන මාර්තු මස 07 වන දින ගොනුකරන ලෙස අනුරාධපුර මහාධිකරණ විනිසුරු නලින්ද හේවාවසම් මහතා ඊයේ (19) නියෝග කළේය.
ආබාධ සහිත කාන්තාවන්ගේ සංගමයේ (ආ.කා.ස ) සභාපති එන්. ඩී. කමලාවතී මහත්මිය, නීතිඥ අමන්දා කල්පශාකා මෙනවියගේ උපදෙස් පරිදි, නීතිඥ ධනුක කුමාරවඩු සහ නීතීඥ ඉසුරු මහේෂ් පණ්ඩිත යන මහත්වරුන් මගින් මෙම නඩුව අනුරාධපුර මහාධිකරණය හමුවේ පවරනු ලැබ තිබේ.
මෙම නඩුවේ වගඋත්තරකරුවන් ලෙස නම් කර ඇත්තේ ප්‍රවාහන, මහා මාර්ග, වරාය සහ සිවිල් ගුවන් සේවා අමාත්‍ය බිමල් රත්නායක මහතා සහ ප්‍රවාහන මහා මාර්ග වරාය හා සිවිල් ගුවන් සේවා අමාත්‍යාංශයේ ලේකම්වරයා, දුම්රිය සාමාන්‍යාධිකාරිවරයා, අධිකාරීවරයා ඉංජිනේරු අධිකාරී (උතුර, අනුරාධපුර) සහ නීතිපතිවරයායි.
ඉන්දීය රජයේ ණය අධාර යටතේ වවුනියාවේ සිට මහව දක්වා දුම්රිය මාර්ගයේ කරන ලද සංවර්ධන කටයුතුවලට සමගාමීව මහව සිට අනුරාධපුරය දක්වා දුම්රිය ස්ථාන සංවර්ධනය කිරීමේදී, 1996 අංක 28 දරන ආබාධිත සහිත තැනැත්තන්ගේ අයිතිවාසිකම් ආරක්ෂා කිරීමේ පනතේ 25 වැනි වගන්තිය යටතේ සාදන ලද අති විශේෂ ගැසට් පත්‍රයේ පල කරන ලද 2006 අංක 1 දරන (ප්‍රවේශ) අනුගමනය කිරීමකින් තොරව අදාළ දුම්රිය ස්ථාන සංවර්ධනය කර ඇති බව මෙම පෙත්සම මහාධිකරණයට ඉදිරිපත් කරමින් පෙත්සම්කාරිය වෙනුවෙන් පෙනී සිටි නීතිඥවරු සිය මූලික කරුණු දැක්වීම්වලදී කියා සිටියහ.
