අපරාධ, මිනීමැරුම් කුමන ආණ්ඩු කාලයේ ආරම්භ කළත් එය විසඳීම තම ආණ්ඩුවේ වගකීම බවත් එය විසඳීමට අවශ්‍ය සුදුසුම පියවර ගන්නා බවත් අධිකරණ සහ ජාතික ඒකාබද්ධතා ඇමැති නීතිඥ හර්ෂණ නානායක්කාර මහතා ප්‍රකාශ කළේය.
ඇමැතිවරයා මේ අදහස් පළ කළේ ඊයේ (19) කොළඹ අලුත්කඩේ අධිකරණයේ ගනේමුල්ල සංජීව නමැත්තාට වෙඩි තැබූ ස්ථානය නිරීක්ෂණයට පැමිණි අවස්ථාවේදීය.
එහිදී මාධ්‍ය වෙත අදහස් දැක්වූ අධිකරණ සහ ජාතික ඒකාබද්ධතා ඇමැති නීතිඥ හර්ෂණ නානායක්කාර මහතා….
“මේක භයානක සහ සීරියස් තත්ත්වයක්. දැන් අපි ඉතාම හොඳ ආරක්ෂාවක් යටතේ තමයි මෙයාව බූස්සේ ඉඳන් ගෙනාවෙත්. මේ ගැන අපිට නඩුකාරතුමන්ලත් එක්කත් අධිකරණ සේවා කොමිසමත් එක්කත් කතා කරන්න වෙනවා.
මෙතැන ආරක්ෂාව තර කරන්නට ඕන. ආරක්ෂාව තර කිරීම අනිවාර්යයෙන් කරනවා. ඒ පිළිබඳ ගැටලුවක් නැහැ. අපරාධ මිනී මැරුම් අපේ ආණ්ඩුව කාලයේ විතරක් නෙමෙයි කලිනුත් තිබුණා. නමුත් ඒක විසඳන එක අපේ වගකීමක්. කවුරු ආරම්භ කළත් එය විසඳන එක අපේ වගකීමක්. ඒකට අවශ්‍ය සියලුම සුදුසු පියවර ගන්නවා.
එස්.ටී.එෆ් එක වුනත් උසාවිය ඇතුළට යන්නේ නැහැනේ. ඒක නිසා කවුරුත් වගකීම් පැහැරහැරියා කියන කතාව නිකන් අභූත චෝදනාවක් විතරයි.”
