අධිකරණය තුළදී පවා අනාරක්ෂිත තත්ත්වයක් නිර්මාණය වී ඇති බැවින් ආරක්ෂාව සම්බන්ධයෙන් දැඩි අවධානය යොමු කරන ලෙස විපක්ෂ නායක සජිත් ප්‍රේමදාස මහතා පාර්ලිමේන්තුවේදී ඊයේ (19) ආණ්ඩු පක්ෂයෙන් ඉල්ලීමක් කළේය.
අද වන විට රටේ නීතිය හා සාමය ක්ෂේත්‍රයේ බරපතළ ගැටලුවක් මතුව මිනීමැරුම් සිදුවන බවත් කුඩා දරුවන් පවා මියයන හෙයින් මීට වඩා ශක්තිමත් විසඳුමක් රජයෙන් අවශ්‍ය බවත් විපක්ෂ නායකවරයා පැවසීය. ඒ සඳහා විපක්ෂය සහයෝගය දීමට සූදානම් බව ද විපක්ෂ නායක සජිත් ප්‍රේමදාස මහතා පැවසීය.
විපක්ෂ නායක සජිත් ප්‍රේමදාස මහතා මේ බව සඳහන් කළේ ගණේමුල්ලේ සංජීව නම් තැනැත්තා අධිකරණය තුළදී ඝාතනය වීම සම්බන්ධයෙන් අදහස් දක්වමිනි.
අධිකරණය තුළ පවා අනාරක්ෂිත තත්ත්වයක් මතුව ඇති බවත් අධිකරණයට පුද්ගලයකු යන්නේ මරණ බියෙන් නම් එය බරපතළ ගැටලුවක් බවත් විපක්ෂ නායකවරයා පැවසීය. එම නිසා මේ පිළිබඳ අවධානය යොමු කර ශක්තිමත්ම තීන්දු තීරණ ගන්නා ලෙස ඉල්ලා සිටින බවත් සමාජය තුළ මෙවැනි දේවල් සිදු නොවිය යුතු බවත් හෙතෙම පැවසීය.
