පෞද්ගලික බැංකුවක සේවකයෙක් වන ඔහුට අපි සෞම්‍ය යැයි කියමු. ඔහු පදිංචිව සිටින්නේ කහතුඩුවේය. සෞම්‍ය පසුගිය දිනක සිය නිවෙසේ තිබූ 205 අංකය දරන ත්‍රිරෝද රථය රැගෙන කහතුඩුව නගරයට යන්නේ සිය දරුවාට කිරිපිටි පැකට්ටුවක් ඇතුළු නිවසට අවශ්‍ය බඩුමුට්ටු කිහිපයක් මිලදී ගන්නටය. වෙළෙඳ සලකට ගොස් අවශ්‍ය අඩුම කුඩුම ටික මිල දී ගෙන නැවත නිවස බලා යමින් සිටියදී නගරයේ රැඳී සිටි රථවාහන අංශයේ නිලධාරීන් පිරිසක් ඔහු ගමන් කළ ත්‍රිරෝද රථය නතර කළේය. මාර්ගයේ අයිනකට වන්න ත්‍රිරෝද රථය නතර කළ බැංකු සේවකයා එයින් බැස ත්‍රිරෝද රථයේ ලියකියවිලි ද රැගෙන පොලිස් නිලධාරීන් රැඳී සිටි ස්ථානය වෙත ගමන් ගත්තේය.
“සර්, මගේ අතින් මොනව හරි වැරැද්දක් වුණාද?” පොලිස් නිලධාරීන් හමුවට ගොස් ලියකියවිලි එක් නිලධාරියෙක් අත තබමින් ඔහු විමසීය. දැනුම්වත්ව ඔහු අතින් රථවාහන වැරැද්දක් ඒ මොහොතේ සිදු වී නොතිබුණු බැවිනි.
පොලිස් නිලධාරියා ලියකියවිලි අතට ගෙන පරීක්ෂා කර බලා “ වාහනේ අංක තහඩුව කෝ” යැයි විමසන්නට විය.
“ ඇයි සර් ඔය ති‍යෙන්නේ” යැයි බැංකු සේවකයා ත්‍රිරෝද රථයේ ඉදිරිපස හා පිටුපස තීන්තෙන් ඇඳ ඇති අංකය පෙන්වනු ලැබීය.
“ තීන්තෙන් අංක අඳින්න බැහැ. ආර්.එම්.වී.එකෙන් අංකයක් නිකුත් කරනවා. ඒ අංක තහඩුවයි වාහනේ තියෙන්න ඕනෑ. ඔයාලට ඕනෑ හැටියට වාහනේ අංක ගහගෙන යන්න බැහැ” පොලිස් නිලධාරියා ගෝරනාඩුවක් දැමීය.
ඒ වන විටත් මාර්ගයේ එවැනිම අංක ගැසූ 205 කාණ්ඩය දරන ත්‍රිරෝද රථ කිහිපයක්ම ධාවනය වෙමින් තිබුණේය.
“තමුන්ට ඒව වැඩක් නැහැ. අපි උසාවි දානවා. අංක තහඩු නැතිව රිය ධාවනය කිරීම සම්බන්ධයෙන්” යැයි කේන්තියෙන් කියමින් නිලධාරියා බැංකු සේවකයාගේ රියදුරු බලපත්‍රය රැගෙන අංක තහඩු නැති රිය ධාවනය කිරීම සම්බන්ධයෙන් නීතිය ක්‍රියාත්මක කළේය.
රියදුරු බලපත්‍රය පොලිස් භාරයට ගෙන පොලීසියෙන් දුන් තාවකාලික බලපත්‍රය ද රැගෙන එම ස්ථානයෙන් පිටවූ බැංකු සේවකයා පසුදින උදෑසනම යන්නේ මෝටර් වාහන දෙපාර්තමේන්තුවටය.
“ පොලීසියට පිස්සුද? 205 කාණ්ඩයේ ත්‍රීවිල්වලට අපි කවදාවත් අංක තහඩු නිකුත් කර නැහැනේ. ඒ අය දන්නේ නැද්ද ඒ බව. ඔයාගේ වාහනේ තීන්තෙන්ම බොඩි එකේ අංකය ගහලා තිබෙනවා කියන්නේ වරදක් නැහැනේ” මෝටර් වාහන දෙපාර්තමේන්තුවෙන් බැංකු සේවකයාට ලැබෙන්නේ එවැනි පිළිතුරකි.
ඒ පිළිතුරත් රැගෙන බැංකු සේවකයා කෙළින්ම යන්නේ කහතුඩුව පොලිස් ස්ථානයටය. පැයක් හමාරක් පොලීසියේ ඔහුට රස්තියාදු වන්නට වූයේ සිය දුක්ගැනවිල්ලට ඇහුම්කන් දෙන්න නිලධාරියෙක් ඉදිරිපත් නොවීම නිසාවෙනි.
“ අංක තහඩුව නැති එක වරදක්. ආර්.එම්.වී. එකෙන් අංක තහඩුවක් දෙන්නේ නැති නම් ඔයා අංක තහඩුවක් කොහෙන් හරි හදාගෙන ගහගන්න ඕනෑ” රථ වාහන අංශයේ පොලිස් නිලධාරීන් බැංකු සේවකයාට ගෝරනාඩුවක් දමමින් පැවසීය.
“ අපි තමුන් උසාවි දාලයි තිබෙන්නේ. උසාවියෙන් බේරගන්න එකයි ඇත්තේ” යැයිද පොලිස් නිලධාරීන් පැවසුවේ හිතක් පපුවක් නැති අය මෙනි.
අසරණ වූ ඔහු මේ ගැන සිය වැඩිමහල් සහෝදරිය මඟින් මාධ්‍ය හිතවතකුට කීවේ තමන්ට වෙන කරන්න කිසිවක් නැති බැවිනි. එම මාධ්‍ය මිතුරා මේ ගැන කියන්නේ රථ වාහන අංශය භාර අධ්‍යක්ෂ ජ්‍යෙෂ්ඨ පොලිස් අධිකාරී මනෝජ් රණගල මහතාටය.
“ත්‍රීවිල්වල 205 කාණ්ඩයට අංක තහඩු ආර්.එම්.වී. එකෙන් දෙන්නේ නැහැ. ඒ ගැන ට්‍රැපික් එකේ පොලීසියේ අය දන්නේ නැති නම් ලොකු වරදක්. අනික ත්‍රීවිල් එකේ ස්ථිර ලෙසම තීන්තෙන් අංකය ලියා තිබෙනවා නම් ඒක වරදක් නොවෙයි.” යැයි පවසමින් මනෝජ් රණගල මහතා ඒ වැරැද්ද නිවැරදි කරන්නට කටයුතු කළේ බැංකු සේවකයා උසාවියට නොයවාය.
“ඇයි ලොක්කෝ ගාවට ගියේ. ලොක්කෝ දන්නවා කිව්වනම් අපි ලයිසන් එක දෙනවනේ” අවසානයේදී කහඩුව පොලීසියේ නිලධාරීන් බැංකු සේවකයාට පවසා ඇත්තේ එවැන්නකි.
