අයහපත් සෞඛ්‍ය තත්ත්වය හේතුවෙන් රෝහල්ගත කළ ෆ්‍රැන්සිස් පාප් වහන්සේගේ සෞඛ්‍ය තත්ත්වය අයහපත් බව නිවේදනයක් නිකුත් කරමින් වතිකානුව ප්‍රකාශ කර ඇතැයි විදෙස් මාධ්‍ය වාර්තා කරයි. බ්‍රොන්කයිටීස් රෝගී තත්ත්වයක් මත පසුගියදා රෝහල්ගත කළ 88 හැවිරිදි පාප් වහන්සේගේ පෙණහලු දෙකටම නිව්මෝනියාව පැතිරී ඇතැයි එම නිවේදනයේ සඳහන් වන බව විදෙස් මාධ්‍ය වැඩිදුරටත් වාර්තා කරයි. පාප් වහන්සේට තවදුරටත් ප්‍රතිකාර කිරීමට අවශ්‍ය බවත්, අතිරේක ඖෂධ ලබාදීමට පියවර ගෙන ඇති බවත් රෝහලේ වෛද්‍ය කාර්ය මණ්ඩලය ප්‍රකාශ කර තිබේ.
ෆ්‍රැන්සිස් පාප් වහන්සේ 21 හැවිරිදි වියෙහි පසුවෙද්දි ආසාදන තත්ත්වයක් හේතුවෙන් එක පෙණහැල්ලක කොටසක් ඉවත් කර ඇති බැවින් වරින් වර පෙණහලු ආසාදිත රෝගවලට ගොදුරු වූ බවත්, මහලු වියට එළැඹීමෙන් පසු එම තත්ත්වය වඩාත් සංකීර්ණ වී ඇති බවත් විදෙස් මාධ්‍ය සඳහන් කරයි.
