වසර 13ක් සිර දඬුවම් විඳ පැමිණ දින 05කදී නීති විරෝධී අයුරින් මහා පරිමාණයෙන් පවත්වාගෙන ගිය මත්පැන් ස්කාගාරයක් වටලා නීති විරෝධී මත්පැන් තොගයක්, මත්පැන් පෙරීමට උපයෝගී කර ගන්නා ගෝඩා බැරල් හා නවීන පන්නයේ පෙරුම් උපකරණ රාශියක් සමඟ පුද්ගලයකු වස්කඩුව ප්‍රදේශයේ දී අත්අඩංගුවට ගත් බව පානදුර වලාන මධ්‍යම දූෂණ මර්දන ප්‍රහාරක බළකාය පවසයි.
මෙසේ අත්අඩංගුවට පත්වූයේ කුඩා වස්කඩුවේ පදිංචි පුද්ගලයෙකි.
මංකොල්ලකෑම්, සොරකම් ඇතුළු අපරාධ සම්බන්ධයෙන් වසර දහතුනක් බන්ධනාගාරගතව සිට මෙම පුද්ගලයා ඉන් නිදහස්ව පැමිණ ඇත්තේ මීට දින පහකට පමණ පෙර බව පොලීසිය පවසයි. මොහු විසින් මහා පරිමාණයෙන් මත්පැන් ස්කාගාරයක් පවත්වාගෙන යන බවට ස්ථානාධිපති ප්‍රධාන පොලිස් පරීක්ෂක ඉන්දික වීරසිංහට ලද තොරතුරකට අනුව බුද්ධි නිලධාරීන් වන පො.සැ. (409) විජේරත්න සහ පො.කො. (39850) අෂාන් යන නිලධාරීන් යොදවා සිදු කළ විමර්ශනයේදී ඒ බව තහවුරු කර ගැනීමෙන් පසුව උප පොලිස් පරීක්ෂක ජයලත් ඇතුළු කණ්ඩායමක් විසින් මෙම වැටලීම සිදු කර තිබේ.
එහිදී කුඩා වස්කඩුව වෙලේ පන්සල පාරේ අත්හැරදමා තිබූ නිවෙසක මෙම මහා පරිමාණ මත්පැන් ස්කාගාරය පවත්වාගෙන ගොස් ඇති අතර එහිදී මත්පැන් පෙරමින් සිටියදී මෙම සැකකරු අත්අඩංගුවට ගැනීමට පොලීසිය කටයුතු කර තිබේ.
හල්තොට සමූහ – විනීතා මානෙල් ගමගේ
කළුතර මධ්‍යම විශේෂ – සුනිල් ශාන්ත
නුගේගොඩ සමූහ – සමීර අබේසිංහ
