දිරාගිය පාපන්දු ගෝල් කණුවක කොටසක් හිස මතට කඩාවැටීමෙන් බරපතළ තුවාල ලැබූ 11 හැවිරිදි සිසුවෙක් ජීවිතක්ෂයට පත්ව ඇතැයි පොලොන්නරුව පොලීසිය පවසයි.
සිය සොහොයුරියගේ ක්‍රිකට් පුහුණුවීම් නැරඹීම සඳහා ඉකුත් 12 වැනිදා තම මව සමඟ පොලොන්නරුව තෝපාවැව මහා විද්‍යාලයේ ක්‍රීඩා පිටියට පැමිණ ඇති මෙම සිසුවා මෙලෙස අවාසනාවන්ත ලෙස අනතුරට ලක්ව ඇතැයි පොලීසිය කියයි.
අනතුරින් පසු දරුවා පොලොන්නරුව මහ රෝහලේ හදිසි ප්රතිකාර ඒකකයේ ප්රතිකාර ලබමින් සිට පසුගිය (15) මෙලෙස අවාසනාවන්ත ලෙස ජීවිතක්ෂයට පත්ව ඇතැයි ද පොලීසිය සඳහන් කරයි.
මෙසේ මියගොස් ඇත්තේ තල්පොත පොලොන්නරුව පදිංචි එම්.කේ.ජී. කවිදු දෙනුවන් සේනාරත්න නමැති 11 හැවිරිදි පොලොන්නරුව පලුගස්දමන මහ විද්‍යාලයේ 6 වන ශ්‍රේණියේ ඉගෙනුම ලබන සිසුවෙකි. සිසුවා දේහය පිළිබඳ මරණ පරීක්ෂණ පසුගිය (15) උදේ පොලොන්නරුව රොහලේදී පැවැත්වුණි. මෙම සිසුවාගේ මොළයට බරපතළ හානි සිදුවීම හේතුවෙන් මෙම මරණය සිදුව ඇතැයි පශ්චාත් මරණ පරීක්ෂණයේදී හෙළි විණ.
දරුවන් දෙදෙනකුගෙන් යුත් පවුලක බාල දරුවා වූ දෙනුවන් ගැමුණුපුර කනිෂ්ඨ විද්‍යාලයේ ඉගෙනීම ලබා පහ වසර ශිෂ්‍යත්ව විභාගයයෙන් ඉහළින්ම සමත් වී පොලොන්නරුව පළුගස්දමන මහා විද්‍යාලයට ඇතුළත්වී හයවන ශ්‍රේණියේ අධ්‍යාපනය ලබමින් සිටි දක්ෂ දරුවකු බව පැවසෙයි.
අදාළ ගෝල් කණුවේ තිබූ දිරාගිය යකඩ කොටස සම්බන්ධයෙන් සොයා බලා එය යථා පරිදි සකස් කිරීමට අදාළ බලධාරීන් කටයුතු කර තිබුණේ නම් මෙවැනි අනතුරක් වළක්වා ගත හැකිව තිබූ බවද ප්‍රදේශවාසීහු පවසති.
මියගිය දරුවාගේ ඇස් සහ අවයව වෙනත් රෝගී දරුවකුට බද්ධ කිරීම සඳහා ඔහුගේ මවුපියන් කැමැත්ත පළ කර ඇතැයි ද වාර්තා වෙයි.
ඇළහැර සමූහ සරත් වෙලගෙදර
