මෙරට මුහුදු සීමාවේදී එක්ස්ප්‍රස් පර්ල් නැව ගිනි ගැනීමේ සිද්ධිය සම්බන්ධයෙන් තමන්ට එරෙහිව මහාධිකරණය හමුවේ ගොනුකර තිබෙන චෝදනා නීති විරෝධී බවට තීරණය කර එම නඩුව නිෂ්ප්‍රභ කරන ලෙස ඉල්ලා එම නැවේ කපිතාන්වරයා සහ එහි දේශීය නියෝජිත සමාගම වූ සී. කොන්සෝටියම් ලංකා සමාගමේ අධ්‍යක්ෂවරු විසින් ගොනුකළ අභියාචනා පෙත්සම් තුනක විභාගය පංච පුද්ගල ශ්‍රේෂ්ඨාධිකරණ විනිසුරු මඬුල්ලක් ඉදිරියේ ඊයේ (17) ආරම්භ කරන ලදි.
යසන්ත කෝදාගොඩ, ඒ.එච්.එම්.ඩී. නවාස්, ශිරාන් ගුණරත්න, අචල වෙංගප්පුලි, ප්‍රියන්ත ප්‍රනාන්දු යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඬුල්ල හමුවේ මෙම පෙත්සම කැඳවනු ලැබිණි.
එම නැවේ දේශීය නියෝජිත සමාගමේ අධ්‍යක්ෂවරු වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා මහතා එහිදී කරුණු ඉදිරිපත් කළේය.
මෙකී නැව මෙරට මුහුදු සීමාවේදී ගිනි ගැනීමේ සිද්ධිය සම්බන්ධයෙන් නීතිපතිවරයා ඉදිරිපත් කළ අධිචෝදනා පත්‍රය දෝෂසහගත බව ඒ මහතා පෙන්වා දුන්නේය.
මෙවැනි සිදුවීමකදී නීතියට අනුව අදාළ නැවේ හිමිකරු සහ මෙහෙයුම්කරුට එරෙහිව අධිචෝදනා ගොනු කළ යුතු නමුත් මෙම නැව ගිනි ගැනීමේ සිද්ධිය සම්බන්ධයෙන් වෙනත් පාර්ශ්වයන්ට එරෙහි අධිචෝදනා ගොනුකර ඇති බව ජනාධිපති නීතිඥවරයා සඳහන් කළේය.
නැව් කපිතාන්වරයා, නියෝජිතවරයා, කොන්සෝටියම් ලංකා සමාගම සහ එහි අධ්‍යක්ෂවරුන්ට එරෙහිව මහාධිකරණයේ නඩු පැවරූ බව ඔහු පෙන්වා දුන්නේය. එය නීතියට අනුව වැරදි සහගත බව ඒ මහතා සඳහන් කළේය.
එහිදී නීතිපතිවරයා වෙනුවෙන් අධිකරණය හමුවේ පෙනී සිටි නියෝජ්‍ය සොලිසිටර් ජනරාල් මාධව තෙන්නකෝන් මහතා සඳහන් කළේ මෙම නඩුකරය ගොනු කිරීමේදී අවස්ථානුකූල වගකීම් බන්ධයෙන් අවධානය යොමුකර අධිචෝදනා ගොනු කළ බවය.
මූලික විරෝධතා ප්‍රතික්ෂේප කරමින් දෙන ලද මහාධිකරණ නියෝගයේදී ඒ සම්බන්ධයෙන් අවධානය යොමුකර ඇති බවද නියෝජ්‍ය සොලිසිටර් ජනරාල් වරයා සඳහන් කළේය.
එම පෙත්සම පිළිබඳව සලකා බැලූ අභියාචනාධිකරණය මෙම ප්‍රතිශෝධන පෙත්සමට අවසර දීමට තරම් නීතිමය පදනමක් හෝ කරුණු අනාවරණය නොවන බවට තීරණය කර වගඋත්තරකාර පාර්ශ්වයට නොතිසි නිකුත් කිරීමකින් තොරවම නිෂ්ප්‍රභ කිරීමට තීරණය කළේය. එම තීන්දුවට එරෙහිව මෙම අභියාචනා පෙත්සම ශ්‍රේෂ්ඨාධිකරණයට ඉදිරිපත් කර ඇත.
පෙත්සම් සම්බන්ධයෙන් වැඩිදුර විභාගය මාර්තු මස 27 වැනිදාට කල් තැබිණි.
නෙල්කා මැදගෙදර
