අය වැය යෝජනාවලිය යටතේ පොදු ප්‍රවාහනය නවීකරණය සම්බන්ධයෙන් රජය ගෙන ඇති පියවර ඉතා ප්‍රශංසනීය යැයි සමස්ත ලංකා බස් මගීන්ගේ සංගමය පවසයි.
එම සංගමයේ කැඳවුම්කරු විමුක්ති දුෂාන්ත විසින් නිවේදනයක් නිකුත් කරමින් කියා ඇත්තේ මේ අය වැය යෝජනාවලිය මඟින් පොදු ප්‍රවාහන ක්ෂේත්‍රයේ විශාල පරිවර්තනයක් වනු ඇති බවයි.
කොළඹ නගරයේ ප්‍රධාන මාර්ග තුනක නව වායු සමීකරණය කළ බස් රථ 100 ක් ධාවනයට යෙදවීමටත්, ශ්‍රී ලංකා ගමනාගමන මණ්ඩලය (SLTB) තවත් බස් රථ (low – floor) 200ක් සිය බල ඇණියට එක් කිරීමට ගෙන ආ යෝජනාව සමස්ත ලංකා බස් මගින්ගේ සංගමයෙහි සාමාජිකයන් ඇතුළු සමස්ත මගී ජනතාවගේම පහසුව සහ ආරක්ෂාව සඳහා ගත් පියවරක් බවද එහි සඳහන් වේ.
මීට අමතවරව දුම්රිය මගී ප්‍රවාහන සේවාව වැඩිදියුණු කිරීම සඳහා පැරණි දුම්රිය මගී මැදිරි ප්‍රතිසංස්කරණය කිරීමටත්, නව මැදිරි නිශ්පාදනය ආරම්භ කිරීමටත්, කැලණි නිම්න දුම්රිය මාර්ගය අවිස්සාවේල්ලෙන් ඔබ්බට දීර්ඝ කිරීමටත් රජය ගෙන ඇති තීරණය අතිශයින්ම අගයන බවත්, දුම්රිය සේවාවෙහි ගුණාත්මකභාවය ඉහළ නැංවීමට මෙම පියවර බෙහෙවින් වැදගත් වන බවත් එහි දැක්වේ.
මලිඳු තෙන්නකෝන්
