රාජ්‍ය සේවක අවම මාසික මූලික වැටුප රුපියල් 24,250 සිට රුපියල් 40,000 දක්වා රුපියල් 15,750 කින් වැඩි කිරීමට යෝජනා කරමින් ජනාධිපති අනුර කුමාර දිසානායක මහතා ජාතික ජන බලවේගයේ මංගල අය-වැය යෝජනාවලිය පාර්ලිමේන්තුවට ඊයේ (17) ඉදිරිපත් කළේය.
පෞද්ගලික අංශ සේවකයන්ගේ අවම මාසික වැටුප රුපියල් 21,000 සිට රුපියල් 27,000ක් ලෙස සහ 2026 වසරේ සිට රුපියල් 30,000ක් ලෙස ඉහළ නැංවීමටද ජනාධිපතිවරයා මෙහිදී යෝජනා කළේය. දැනට පවතින රාජ්‍ය සේවකයන්ගේ තාවකාලික අතුරු දීමනාව සහ විශේෂ දීමනාව මූලික වැටුපට ඒකාබද්ධ කරන අතර රුපියල් 8,250ක ශුද්ධ වැඩිවීමක් මූලික අවම වැටුපට අදාළව සිදු කිරීමට යෝජනා කරන බවත් රාජ්‍ය සේවකයන්ගේ වැටුප් වැඩිවීමට සමගාමීව අධිකරණ සේවා, රාජ්‍ය සංස්ථා, ව්‍යවස්ථාපිත මණ්ඩල, විශ්වවිද්‍යාල කාර්ය මණ්ඩල සහ ත්‍රිවිධ හමුදා නිලධාරීන් සඳහා ද මෙය අදාළ වන බව ජනපතිවරයා අවධාරණය කළේය.
මුළු ශුද්ධ වැටුප් වැඩිවීමෙන් රුපියල් 5,000ක් සහ ඉතිරි මුදලින් සියයට 30ක් 2025 වසරේ අප්‍රේල් මාසයේ සිට ගෙවනු ලබන අතර, ඉතිරි සියයට 70 2026 වසරේ ජනවාරි සහ 2027 වසරේ ජනවාරි මාසවල දී සමාන කොටස් වශයෙන් ගෙවනු ලබන අතර 2025 වසරේ දී යෝජිත වැටුප් වැඩිවීම සඳහා රුපියල් බිලියන 110ක් වෙන් කෙරේ.
රුපියල් 15,750ක අවම මාසික මූලික වැටුප් වැඩිවීමට අමතරව වාර්ෂික වැටුප් වර්ධකයේ වටිනාකම සියයට 80කින් ඉහළ නැංවීමට යෝජිතය. ඒ අනුව, රුපියල් 250ක අවම වාර්ෂික වැටුප් වර්ධකය රුපියල් 450 දක්වා ඉහළ යනු ඇත. රාජ්‍ය අංශයේ සියලුම සේවකයන්ගේ වාර්ෂික වැටුප් වර්ධකය එම ප්‍රතිශතයට ගැළපීමට ද යෝජනා කර ඇත.
රාජ්‍ය අංශයේ අත්‍යවශ්‍ය පුරප්පාඩු සඳහා 30,000ක් බඳවා ගැනීමට නියමිත අතර මෙම වැටුප් වැඩිවීමේ කොටසක් ලෙස, යෝජිත 2025 වැටුප් ක්‍රමය යටතේ විශ්‍රාම ප්‍රතිලාභ ලැබෙන බව සහතික කරමින්, 2025 ජනවාරි මස 1 වැනිදා හෝ ඉන් පසුව විශ්‍රාම යන නිලධාරීන්ගේ විශ්‍රාම ප්‍රතිලාභ නව වැටුප් ව්‍යුහය මත ගණනය කිරීමට යෝජනා කර ඇති අතර රාජ්‍ය සේවකයන්ගේ ආපදා ණය සීමාව රුපියල් 250,000 සිට රුපියල් 400,000 දක්වා ඉහළ නැංවීමටද යෝජනා කර ඇත.
මෙම වැටුප් වැඩිවීමේ සමස්ත ඇස්තමේන්තුගත වියදම රුපියල් බිලියන 325ක් වනු ඇතැයි අපේක්ෂා කෙරේ. පවතින රාජ්‍ය මූල්‍ය බාධාවන් සැලකිල්ලට ගනිමින් මෙම වැටුප් වැඩිවීම අදියර වශයෙන් ක්‍රියාත්මක කිරීමට යෝජනා කරන බවත් ඔහු කියා සිටියේය.
2025 ජනවාරි මස 1 වැනිදා හෝ ඉන් පසුව විශ්‍රාම යන නිලධාරීන්ගේ විශ්‍රාම ප්‍රතිලාභ නව වැටුප් ව්‍යුහය මත ගණනය කිරීමට යෝජනා කරන බවත්, රාජ්‍ය සේවක අවම මූලික වැටුප වැඩි කිරීම සලකා බැලීමේ දී රාජ්‍ය සේවකයන්ගේ ආපදා ණය සීමාව දැනට පවතින රුපියල් 250,000 සිට රුපියල් 400,000 දක්වා ඉහළ නංවන බව ද ජනාධිපතිවරයා ප්‍රකාශ කළේය.
අය-වැය යෝජනාවලිය ඉදිරිපත් කිරීම වෙනුවෙන් පාර්ලිමේන්තුවේ කථානායක වෛද්‍ය ජගත් වික්‍රමරත්න මහතාගේ ප්‍රධානත්වයෙන් ඊයේ (17) පෙරවරු 10.30ට රැස් විය. ජනාධිපති අනුර කුමාර දිසානායක මහතා සිය මංගල අය-වැය ඉදිරිපත් කිරීම සඳහා 10.34ට පමණ සභාවට පැමිණි අතර ඉන් පසුව අය-වැය ඉදිරිපත් කිරීම ආරම්භ කළේය.
අය-වැය ඉදිරිපත් කිරීමට පැමිණෙන ජනාධිපතිවරයා පසුපසින් ආණ්ඩුවේ මැති ඇමැතිවරුන් පැමිණෙන ආකාරය සාමාන්‍ය‍ෙයන් දක්නට ලැබුණ ද ඊයේ එලෙස කිසිවකු පැමිණෙන අයුරු දක්නට නොලැබිණ. වේත්‍රධාරී කුෂාන් ජයරත්න මහතා සමඟ සභාවට පැමිණි ජනාධිපතිවරයා තමාට හිමි ආණ්ඩු පක්ෂයේ 08 වැනි ආසනයෙහි අසුන් නොගෙනම අඛණ්ඩව උස්හඬින් සහ නොපැකිළිව සිංහල භාෂාවෙන් අය-වැය යෝජනාවලිය විපක්ෂයේ බාධා කිරීම්වලින් තොරව පැය දෙකහමාරකට වැඩි කාලයක් පුරා ඉදිරිපත් කළේය. මෙම වසරට මෙන්ම කෙටිකාලීන, මධ්‍යකාලීන සහ දිගුකාලීන යෝජනා රැසක් 2025 වසර සඳහා ඉදිරිපත් කළේය.
2025 වසරේ ලක්ෂ 25 ඉක්ම වූ සංචාරක පැමිණීමක් අපේක්ෂා කරන අතර සංචාරක ව්‍යාපාරයේ යටිතල පහසුකම් සංවර්ධය කිරීම ඇතුළු සංචාරක කර්මාන්තය ප්‍රවර්ධනය වෙනුවෙන් රුපියල් මිලියන 500ක් මෙවර අය-වැයෙන් වෙන්කර ඇති බව ද පැවැසීය. සංචාරක කර්මාන්තය ප්‍රවර්ධනයට ඩිජිටල් ටිකට් පත් ක්‍රමවේදයක් ද හඳුන්වා දෙන අතර මෙරටට පැමිණෙන සංචාරකයින් වෙනුවෙන් නව ගමනාන්ත හඳුන්වා දෙමින්, Brand City නිර්මාණය කිරීමට අපේක්ෂා කරන බව ද ජනාධිපතිවරයා පැවැසීය.
2025 වසර සඳහා රජයේ සෞඛ්‍ය අය-වැය ප්‍රතිපාදනය රුපියල් බිලියන 604ක් දක්වා සැලකිය යුතු ලෙස ඉහළ දැමීමට කටයුතු කළ බවත් ඖෂධ සැපයුම සහතික කිරීම සඳහා 2025 අය-වැයෙන් රුපියල් බිලියන 185ක් වෙන් කර ඇති බවත් ජනාධිපතිවරයා එහිදී පැවසී ය. ජාතික ඖෂධ නියාමන අධිකාරිය සහ රාජ්‍ය ඖෂධ නීතිගත සංස්ථාව ඩිජිටල්කරණය කිරීමට කටයුතු කරන බව ද ජනාධිපතිවරයා සඳහන් කළේය.
තවද ස්නායු ආබාධිත දරුවන් සඳහා ප්‍රතිකාර ලෙස ජාත්‍යන්තර ප්‍රමිතීන් සහතික ප්‍රතිකාර මධ්‍යස්ථානයක් රිජ්වේ ආර්යා ළමා රෝහලේ ඇති කිරීමට රුපියල් මිලියන 200ක් වෙන් කිරීමට ද මෙම අය-වැයෙන් කටයුතු කර ඇත. මන්ත්‍රීවරුන්ට පර්මිට් එක ලබා නොදෙන අතර මෙම වසරේදී වාහන ලබාදීමක් ද සිදු නොකරන අතර ඒ සඳහා අය-වැයෙන් මුදල් වෙන්කර නොමැති බවත් එසේ සිදු කළහොත් ආර්ථිකයට දරාගත නොහැකි තත්ත්වයක් ඇතිවන බව ද හෙතෙම පැවැසීය.
එමෙන්ම මහජන නියෝජිතයින්ට ලබාදෙන දීමනා සහ ප්‍රතිලාභ සම්බන්ධයෙන් සමස්ත පද්ධතියම සමාලෝචනය කරන අතර ඒ අනුව ලක්ෂ 10ට පැවැති රක්ෂණය රුපියල් ලක්ෂ දෙකහමාර දක්වා අඩුකරන බව ද පැවැසීය.
වියදම් කළමනාකරණයේ දී දේශපාලන නායකයින් ලෙස රටට ආදර්ශයක් ලබාදීමට ඇමැති මණ්ඩලය, අමාත්‍යවරු 21කට සීමා කළ බවත්, රජයේ වියදම් අඩු කරමින් අමාත්‍යවරුන්ගේ හා නියෝජ්‍ය අමාත්‍යවරුන්ගේ වියදම් තාර්කිකරණය කර ඇතැයි ද කියා සිටියේය.
ජනාධිපති, අගමැති සහ මැති ඇමැතිවරු සම්බන්ධයෙන් වෙන් කළ පොදු සම්පත් ඵලදායී ලෙස මහජන සංචිතයට යොමු කිරීමට කමිටුවක් දැනටමත් පත්කර ඇතැයි ද ජනාධිපතිවරයා පැවැසීය.
අධික නඩත්තු වියදම් දැරීමට සිදුවන රජයේ සියලු සුඛෝපභෝගී වාහන මාර්තු මාසයේ වෙන්දේසි කරන බව ද ජනාධිපතිවරයා කියා සිටියේය.
තෝරාගත් රජයේ නිලධාරීන්ට සුදුසු මූල්‍ය ප්‍රතිපාදන ලබාදීම හරහා වාහන සඳහා වූ අධික වියදම් අවම කරන බව ද ජනාධිපතිවරයා පැවැසීය.
2024 – 2025 මහ කන්නයේ සිට ප්‍රමාණවත් වී තොග පවත්වාගෙන යෑමට අපේක්ෂා කරන අතර එම කන්නය සඳහා රුපියල් මිලියන 5,000ක් වී මිල දී ගැනීමට වෙන්කර ඇතැයි ද පැවැසීය. එමෙන්ම පොහොර සහනාධාරය සඳහා මේ වසරට රු. මිලියන 35,000ක් වෙන් කරන බව ද ජනාධිපතිවරයා ප්‍රකාශ කළේය.
ස්වර්ණා විජේකෝන්, සන්ධ්‍යා කරුණාරත්න
din-02-18-pg05-R1_compressed din-02-18-pg06-R1 din-02-18-pg07-R1 din-02-18-pg09-R1 din-02-18-pg10-R1 din-02-18-pg11-R1
11 පිටුවෙන් අය – වැය කතාව ඉතිරි….
විදේශගතව සිටින ශ්‍රී ලාංකිකයින්ගෙන්ද ඉල්ලීමක් කළ යුතුයි. ඇතැම්විට ඔබ ශ්‍රී ලංකාවේ උපත ලබා විදෙස්ගත පුරවැසියන් ලෙස ජීවත් වනවා විය හැකියි. එහෙත් ඔබට ඇත්තේ ශ්‍රී ලංකාවේ මූලයන් බව අප විශ්වාස කරනවා. සමහරවිට ඔබ ඔබේ මව්බිම ගැන ඔබේ දෙමාපියන්ගෙන් පමණක් අසා ඇති වන්නට පුළුවන්. අපට නම් ඔබ සියලු දෙනාම ශ්‍රී ලාංකිකයින් බව අප විශ්වාස කරනවා.
ඔබේ රට ඔබේ සාර්ථකත්වය ගැන ආඩම්බර වෙනවා. අපේ මව්බිම පිළිබඳ ඔබ විශ්වාසය අහිමි වීමට හේතු අපට තේරුම්ගත හැකියි. ඔබ ඔබේ විශේෂඥ දැනුම, දක්ෂතා හා දෘෂ්ටිකෝණය අපේ මේ මනරම් දූපත් රටට දායක කිරීමට ගන්නා සෑම උත්සාහයක් සඳහාම අප හදවතින්ම කෘතඥ වෙනවා. අප ඔබට ආරාධනා කරනවා, ශ්‍රී ලංකාව කොතරම් වෙනස් වී ඇත්දැයි බැලීමට ආපසු එන්න. පෞද්ගලික, රාජ්‍ය හෝ ලාභ නොලබන අංශයේ වුවද, ඔබේ විශේෂඥ දැනුම, ආකල්ප හා දෘෂ්ටිකෝණය අපේ අධිෂ්ඨානශීලී දූපතට දායක කරන්න. අප සමඟ එකතු වන්න, අප සමඟ වැඩ කරන්න, අපට එක්ව ළඟා කළ හැකි සාර්ථකත්වයට එක්වන්න.
ගතවූ වසරේ දී, අපගේ රටවැසියන් බොහෝ දෙනෙක් නව මාර්ගයක් නිර්මාණය කිරීමටත්, අපේ රට නැවත ගොඩනැගීමටත්, අපේ පුරවැසියන්ගේ සම්පූර්ණ ශක්තිය ඊට ලබා ගැනීමටත් ඡන්දය ප්‍රකාශ කළා. ඉතිහාසයේ ප්‍රථම වතාවට, ශ්‍රී ලංකාවේ සියලුම ප්‍රදේශ, උතුරේ සිට දකුණ දක්වා, නැඟෙනහිර සිට බස්නාහිර දක්වා, පොදු අරමුණක් යටතේ එකට එක්වුණා. ආගම, ජාතිය, ලිංගිකත්වය, පන්තිය හා වයස තවදුරටත් අපව බෙදන්නේ නැතිබව අවධාරණය කළ යුතුයි. අපේ රටේ ජනතාව නැවත කිසි විටෙකත් එකිනෙකාට එරෙහිව බෙදෙන්නේ නැති බව අපට සහතිකයි. ඒ වගේම, තමන්ගේ දේශපාලනික හෝ පෞද්ගලික ලාභ සඳහා අපේ රටේ ජනතාව එකිනෙකාට එරෙහිව පොලඹවා ගැනීමට උත්සාහ කරන්නන්ගෙන් මුළා නොවන බවට සහතිකයි.
අපගේ රජයේ මහජන නියෝජිතයින් හෝ අප විසින් පත් කළ නිලධාරීන් සියලු දෙනාම තුළ ඇත්තේ පොදු අරමුණක්. ඒ වගේම වෙනසක් කිරීමට අප සමඟ එක්වූ දහස් ගණනක් වෙහෙස මහන්සි වී වැඩ කරන දේශප්‍රේමී රාජ්‍ය සේවකයින්ට ඇත්තේත් එවැනි පොදු අරමුණක්. අපි කිසි විටෙකත් එම වගකීමෙන් සහ ප්‍රතිපත්තිවලින් බැහැර නොවන අතර, කුමන හේතුවකටවත් මෙරට පුරවැසියන්ගේ අපේක්ෂාවන් පාවා නොදෙන බවට සහතික වෙනවා. අපි ඒ ආදර්ශය නායකත්වයේ සිටම ලබා දෙනවා. සියලුම ශ්‍රී ලාංකිකයන් එක්ව මේ රට ඉහළින් ඔසවා තබමු. සියලු දෙනා එක්ව සමෘද්ධිමත් වෙමු. අප සියලු දෙනාම එකිනෙකා ගැන ගෞරවනීය වෙමු. මෙම ලස්සන, පූජනීය දූපත, අපේ මාතෘභූමිය වීම ගැන ආඩම්බර වෙමු. අවසාන වශයෙන්, අය – වැය සකස් කිරීම සඳහා සති ගණනාවක් වෙහෙස නොබලා කටයුතු කළ මුදල් අමාත්‍යාංශයේ නිලධාරීන්ට, විශේෂයෙන් භාණ්ඩාගාර ලේකම් මහින්ද සිරිවර්ධන මහතාට, මාගේ කෘතඥතාවය පළ කරනවා. රජයේ ආර්ථික වැඩසටහන ඉදිරියට ගෙන යාම සඳහා අය – වැය යෝජනා නියමිත වේලාවට සාර්ථක ලෙස ක්‍රියාත්මක කිරීම සඳහා භාණ්ඩාගාර නිලධාරීන්ගේ සහයෝගය මා තවදුරටත් අපේක්ෂා කරනවා.
ස්තූතියි!
