ගාල්ල, යටගල රජමහා විහාරස්ථ භූමියේ අටවිසි බෝධීන් වහන්සේ රෝපණය කිරීමේ මහා පින්කම ඊයේ (12) උදේ යෙදුණු සුබ මොහොතින් උත්සවාකාරයෙන් සිදු කෙරුණි. 
කුරුවිට බෝසත් අසපුවේ විහාරාධිපති පොදු රාජ්‍ය මණ්ඩලීය බෞද්ධ කවුන්සිලයේ සභාපති තෙප්පනාවේ පියදස්සි හිමියන්ගේ ඉල්ලීම පරිදි නුගේගොඩ, උඩහමුල්ල සුවසහන පාරිසරික පදනමේ සභාපති නාවින්න බණ්ඩාරනායක අනුස්මරණ ආයුර්වේද පර්යේෂණායතනයේ අධ්‍යක්ෂ වෛද්‍ය පී. හේවා ගමගේ මහතා විසින් යටගල සහ සිතුල්පව්ව උභය රජමහා විහාර ප්‍රමුඛ අෂ්ට විහාරාධිකාරි ශාස්ත්‍රපති පණ්ඩිත ලේල්වල සමිත හිමියන් වෙත මෙම අටවිසි බෝධීන් වහන්සේ ලබා දී තිබුණි. පසුව තමා පැවිදි බව ලැබූ කැටගොඩ සඟ පරපුරෙහි මූලස්ථාන විහාරය වන යටගල රජමහා විහාරස්ථ භූමියේ රෝපණය කිරීම සඳහා සමිත හිමියන් විසින් මෙම අටවිසි බෝධීන් වහන්සේ යටගල හෙට්ටාචල පරිවේණාධිපති ගත් කතු ශාස්ත්‍රපති පදලංගල අස්සජි හිමියන් වෙත පරිත්‍යාග කරනු ලැබිණ.
ඒ අනුව යටගල මංසන්ධියේ සිට පෙරහරකින් යටගල රජමහා විහාරස්ථානය වෙත වැඩමවාගෙන ආ අටවිසි බෝධීන් වහන්සේ යටගල රජමහා විහාරස්ථ භූමියේ දී රෝපණය කෙරිණ. මෙරට ඉතා ස්වල්ප ස්ථාන කිහිපයක පමණක් අටවිසි බෝධීන් වහන්සේ රෝපණය කර ඇති අතර, ගාල්ල දිසාවේ මෙසේ අටවිසි බෝධීන් වහන්සේ රෝපණය කර ඇත්තේ මෙම විහාරස්ථ භූමියේ පමණි. යටගල සහ සිතුල්පව්ව උභය රජමහා විහාර ප්‍රධාන අෂ්ට මහා විහාරාධිපති දක්ෂිණ ලංකාවේ සමථ බලසම්පන්න ප්‍රධාන අධිකරණ සංඝනායක තල්පෙ අරියජෝති නාහිමියන්ගේ අනුශාසනා පරිදි පදලංගල අස්සජි හිමියන්ගේ මෙහෙයවීම මත එම විහාරස්ථ දායක සභාවේ සභාපති කීර්ති කලහේ ලියනගේ මහතා ඇතුළු දායක සභාව විසින් මෙම පින්කම සංවිධාන කරනු ලැබ තිබුණි.
දකුණු පළාත් සංචාරක – එස්. දීයගහගේ
