රාජ්‍ය සේවයේ පවතින පුරප්පාඩු සඳහා අලුතින් 7456 දෙනකු බඳවා ගැනීමට ජනාධිපති අනුර කුමාර දිසානායක මහතාගේ ප්‍රධානත්වයෙන් පසුගියදා (09) රැස්වූ කැබිනට් මණ්ඩල රැස්වීමේදී අනුමැතිය ලැබී තිබේ. ඒ අනුව අමාත්‍යාංශ 7කට, පළාත් සභා 2කට සහ කොමිෂන් සභාවකට වශයෙන් මේ පිරිස බඳවා ගැනීමට නියමිතය. රාජ්‍ය පරිපාලන, පළාත් සභා සහ පළාත් පාලන අමාත්‍යාංශයට 3000ක්, ආරක්ෂක අමාත්‍යාංශයට 9ක්, විද්‍යා හා තාක්ෂණ අමාත්‍යාංශයට 179ක්, මුදල් හා ක්‍රමසම්පාදන අමාත්‍යාංශයට 132ක්, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශයට 400ක්, ප්‍රවාහන, මහාමාර්ග හා වරාය හා සිවිල් ගුවන් සේවා අමාත්‍යාංශයට 161ක්, සෞඛ්‍ය හා ජනමාධ්‍ය අමාත්‍යාංශයට 3519ක්, බස්නාහිර පළාත් සභාවට 34ක්, නැඟෙනහිර පළාත් සභාවට 5ක් ශ්‍රී ලංකා මානව හිමිකම් කොමිෂන් සභාවට 17ක් වශයෙන් මේ 7,456 දෙනා බඳවා ගැනීමට නියමිතය.
රාජ්‍ය සේවයේ බඳවා ගැනීම් ක්‍රියාවලිය සමාලෝචනය කරමින් අවශ්‍යතා, ප්‍රමුඛතා, කාලරාමු හා ඒ ආශ්‍රිතව අත්‍යවශ්‍යයෙන්ම සිදු කළ යුතු බඳවා ගැනීම් ප්‍රමාණයන් හඳුනාගෙන ඒ අනුව, අවශ්‍ය පියවර ගැනීම සඳහා අග්‍රාමාත්‍ය ලේකම්වරයාගේ ප්‍රධානත්වයෙන් පත් කරන ලද කමිටුව මඟින් මේ පුරප්පාඩු සම්බන්ධයෙන් රජය දැනුම්වත් කර තිබේ. මේ අනුව වැඩිම පිරිසක් බඳවා ගැනීමට නිර්දේශ කර ඇත්තේ සෞඛ්‍ය හා ජනමාධ්‍ය අමාත්‍යාංශයට වේ. අඩුම බඳවා ගැනීම නිර්දේශ කර ඇත්තේ ආරක්ෂක අමාත්‍යාංශයටය.
කමිටුවේ නිර්දේශ ක්‍රියාත්මක කිරීමට අදාළව අගමැති හරිනි අමරසූරිය මහත්මිය අදාළ යෝජනාව ඇමැති මණ්ඩලයට ඉදිරිපත් කළ බවත් ඊට කැබිනට් මණ්ඩලයේ අනුමැතිය පළ වූ බවත් කැබිනට් ප්‍රකාශක, ඇමැති වෛද්‍ය නලින්ද ජයතිස්ස මහතා කැබිනට් තීරණ දැනුම්දීම සඳහා රජයේ ප්‍රවෘත්ති දෙපාර්තමේන්තුවේදී පැවැති මාධ්‍ය සාකච්ඡාවේදී ඊයේ (11) ප්‍රකාශ කළේය. රාජ්‍ය සේවයේ බඳවා ගැනීම් ක්‍රියාවලිය සමාලෝචනය කරමින් අවශ්‍යතා, ප්‍රමුඛතා හා කාලරාමු සහ ඒ ආශ්‍රිතව අත්‍යවශ්‍යයෙන්ම සිදු කළ යුතු බඳවා ගැනීම් ප්‍රමාණයන් හඳුනාගෙන ඒ අනුව, අවශ්‍ය පියවර ගැනීම සඳහා අග්‍රාමාත්‍ය ලේකම්ගේ ප්‍රධානත්වයෙන් නිලධාරි කමිටුව පත් කිරීමට අනුමැතිය ලැබී තිබුණේ ගිය වසරේ දෙසැම්බර් 30 වැනිදා පැවැති කැබිනට් රැස්වීමේදීය. විවිධ අමාත්‍යාංශ මඟින් ඒ යටතේ පවතින දෙපාර්තමේන්තු සහ අනෙකුත් ආයතනවල ඇති තනතුරු පුරප්පාඩු සම්පූර්ණ කිරීම සඳහා ඉදිරිපත් කරන ලද ඉල්ලීම් සැලකිල්ලට ගෙන කමිටුව මඟින් මේ 7,456 දෙනා බඳවා ගැනීමට නිර්දේශ කර තිබේ. මේ සම්බන්ධයෙන් අදහස් දක්වමින් කැබිනට් මාධ්‍ය ප්‍රකාශක, ඇමැති වෛද්‍ය නලින්ද ජයතිස්ස මහතා පැවසුවේ මේ බඳවා ගැනීම් සිදු කරන්නේ සේවා අවශ්‍යතාව, ප්‍රමුඛතාව මත මිස සේවකයන් හත් අටදාහක් හෝ දහදහසක් බඳවා ගැනීමේ අවශ්‍යතාව මත නොවන බවයි. මේ බඳවා ගැනීම් උපරිම මාස දෙකක් ඇතුළත කිරීමට හැකිවනු ඇති බව පැවසූ ඇමැතිවරයා මේ කිසිදු පත්වීමක් දේශපාලන උවමනාවට සිදු නොකරන බවත් කීවේය. ඇමැතිගේ පළාතෙන් පුරප්පාඩු පුරවා රාජ්‍ය සේවය තවදුරටත් බරක් වෙන තැනකට ගෙන ඒමට ආණ්ඩුවට අවශ්‍යතාවක් නැතැයි ද හෙතෙම වැඩිදුරටත් පැවසුවේය.
නුවන් කොඩිකාර
