-පොලොන්නරුවෙන් ආ යුවළකට මාංචු
හොරණ, පෝරුවදණ්ඩ ප්‍රදේශයේ පවත්වාගෙන ගිය නීති විරෝධී ව්‍යාජ කච්චේරියක් වටලා එහි තිබී ජාතික හැඳුනුම්පත්, ආදායම් බලපත්‍ර ඇතුළු ව්‍යාජ ලේඛන තොගයක් හා ඒවා සැකසීමට භාවිත කරන උපකරණ සමඟ අඹුසැමි යුවළක් අත්අඩංගුවට ගත් බව කොළඹ දකුණ කොට්ඨාස අපරාධ විමර්ශන කාර්යාංශය පැවසීය.
පොලීසිය පැවසුවේ, පොලොන්නරුව ප්‍රදේශයෙන් හොරණට පැමිණ, රුපියල් 35,000ක කුලී පදනම මත නිවෙසක් ලබාගෙන සුරතල් මසුන් ඇති කරන මුවාවෙන් වාහනවල හිමිකම් සහතික හා පුද්ගලයන්ගේ අනන්‍යතා සහතික ව්‍යාජ ලෙස සකසන මෙම ව්‍යාජ කච්චේරිය පවත්වාගෙන ගොස් ඇති බවයි.
ඒ අනුව, සැකකාර යුවළ පදිංචි හොරණ, පෝරුවදණ්ඩ ප්‍රදේශයේ නිවෙසට ගොස් පරීක්ෂා කිරීමේදී එහි තිබී ව්‍යාජව සකසන ලද ජාතික හැඳුනුම්පත් අටක්, රක්ෂණ සහතික තුනක්, රියැදුරු බලපත්‍ර මුද්‍රණය කිරීම සඳහා භාවිත කරන කාඩ්පත් 12ක්, ආදායම් බලපත්‍ර 3ක්, දුම් සහතික 3ක්, නැවත පවරා නොගැනීමේ සහතිකයක්, ඩී.වී.ඩී හා සී.ඩී පට 48ක්, ලැප්ටොප් යන්ත්‍රයක් හා ජංගම දුරකතන 3ක් පොලිස් භාරයට ගෙන තිබේ. සැකකාර යුවළ පදිංචි නි‍ෙවස පරීක්ෂා කිරීමේදී එම ව්‍යාජ සහතික මුද්‍රණය කිරීම සඳහා භාවිත කරන වර්ණ ප්‍රින්ටරයක්, ලැමිනේටින් යන්ත්‍රයක්, ස්කෑනර් යන්ත්‍රයක්, පොලිමර් සීල් හදන යන්ත්‍රයක්, ඒ සඳහා භාවිත කරන වර්ණ තීන්ත තොගයක් ද තිබී සොයාගෙන ඇත. පොලීසිය පැවසුවේ, මෝටර් රථ ප්‍රවාහන කොමසාරිස්, ෆිනෑන්ස් ආයතන ප්‍රධානීන්ගේ හා ප්‍රාදේශීය ලේකම්වරුන්ගේ නිල මුද්‍රා 28ක් එහි තිබී හමුවූ බවයි.
එම නිල මුද්‍රා අතර මිනුවන්ගොඩ, මින්නේරිය, පුත්තලම, හිඟුරක්ගොඩ හා බටපොළ ඇතුළු දිවයිනේ ප්‍රදේශ රැසක ප්‍රාදේශීය ලේකම්වරුන්ගේ හා රක්ෂණ නියෝජිතයන්ගේ මුද්‍රා තිබී හමු වූ බව ද පොලීසිය කියා සිටියේය.
මීට අමතරව නිවෙස පරීක්ෂා කිරීමේදී හමුවූ ස්කූටි වර්ගයේ යතුරුපැදි දෙක බදුල්ල, ඇල්ල ප්‍රදේශයේ වාහන කුලියට ලබා දෙන ස්ථානයකට ව්‍යාජ තොරතුරු සපයා ලබාගෙන ඔවුන්ගේ පෞද්ගලික පරිහරණය සඳහා තබාගෙන සිට ඇති බවත්, මාතලේ ප්‍රදේශයෙන් තවත් යතුරුපැදියක් එලෙස ලබාගෙන පොලොන්නරුව ප්‍රදේශයට ව්‍යාජ අංක තහඩු හා හිමිකම් සහතික සකසා විකුණා ඇති බවටත් තොරතුරු අනාවරණය වී තිබේ.
‘පොත් නැති වාහන’ නමින් මුහුණුපොතේ පවත්වාගෙන යන ගිණුමකට සැකකාර යුවළ සම්බන්ධ වී එහි ඉල්ලුම්කරුවන්ට මෙසේ ව්‍යාජ සහතික නිකුත් කර ඇති බවත්, ඒ සඳහා රුපියල් 5,000 සිට 90,000 දක්වා මුදල් අයකර ඇති අතර, එලෙස කෝටි ගණනක මුදල් වසර කිහිපයක් තිස්සේ දිවයිනේ ප්‍රදේශ රැසක පුද්ගලයන් රවටා ලබාගෙන ඇති බවට ද තොරතුරු අනාවරණය වී තිබේ.
අත්අඩංගුවට පත් සැකකරු මෘදුකාංග ශිල්පියකු වන අතර, බිරිය ද ඊට සහාය වෙමින් මෙම ජාවාරම කරගෙන ගොස් තිබේ. සැකකාර පුද්ගලයා මීට වසර 15කට පෙර බාලවයස්කාර දැරියක් දූෂණය කිරීම හා 2021 වසරේදී බම්බලපිටිය ප්‍රදේශයෙන් ඇල්ටෝ වර්ගයේ මෝටර් රථයක් කුලී පදනම මත ලබාගෙන ඊට ව්‍යාජ ලේඛන සකසා අලෙවි කිරීමේ සිද්ධියක් සම්බන්ධයෙන් බන්ධනාගාරගතව සිට ඇප මත නිදහස්ව පැමිණි පුද්ගලයකු බවට ද අනාවරණය වී තිබිණ. සැකකරුවන් ගල්කිස්ස අධිකරණයට ඉදිරිපත් කිරීම සඳහා ඊයේ (10) වැල්ලවත්ත පොලීසියට භාර දීමට නියමිතව තිබුණි.
කොට්ටාව – ප්‍රදීප් කුමාර
