තම ගම්මානයේ ඇති මාර්ගය වසර ගණනාවක් තිස්සේ පිළිසකර නොකිරීම නිසා පලුගස්වැව ප්‍රාදේශීය ලේකම් කොට්ඨාසයේ, ගොපැල්ල ගම්මානයේ ජනතාව දැඩි අපහසුතාවට පත්ව ඇතැයි එම ගම්මානයේ ජනතාව පවසති. මේ සම්බන්ධයෙන් එම ගම්වාසීහු මෙසේ අදහස් දැක්වූහ.
ආර්.එම්. ඉන්දිරා උපුල් කුමාරි මහත්මිය
Òඋදුරුව හන්දියේ ඉඳන් ගල්කිරියාගමට යන පාරට මේ පාර සම්බන්ධ වෙනවා. මේක කිලෝ මීටර් 2ක් තියෙනවා. මේ ගමේ පවුල් 150ක් විතර ඉන්නවා. ගොඩාක් අය ජීවත් වෙන්නේ ගොවිතැන් කරලා. එහෙම නැත්නම් කුලියක් කරලා. පාර අවුරුදු ගාණකින් හදලා නැහැ. පාරේ යන්නම බැහැ. ගමේ මිනිස්සු එළවළු ටික, වී ටික අරගෙන යන්නේ මේ පාරේ. දරුවො පාසල් යන්නේ මේ පාරේ. වැස්ස දවසට දරුවෝ එන්නේ මඩ නාගෙන. මේ ගමේ ගොඩක් පාසල් දරුවන්ට තියන්නේ එක නිල ඇඳුමයි. ඒකෙ මඩ ගෑවුණාම ඊළඟ දවසේ පාසල් යන්න විදිහක් නැහැ. මේ ගැන කියන්න ඕනි හැම කෙනාටම කිව්වා. කවුරුත් දුප්පත් අපේ ප්‍රශ්නවලට ඇහුම්කන් දෙන්නේ නැහැ.Ó
ඩබ්.එම්. ගයානි මහත්මිය
Òඋදුරුව හන්දියේ ඉඳලා ගල්කිරියාගම හන්දියට ප්‍රධාන පාරේ යන්න කිලෝ මීටර් 6ක් විතර තියෙනවා. මේ පාරේ තියෙන්නේ කි.මී. 2ක් විතරනේ. මේක කෙටි මාර්ගයක්. ඒ නිසා ගොඩාක් රියැදුරෝ රවුම් පාරේ යන්නේ නැහැ. යන්නේ මේකෙන්. නිතර වාහන යන හින්දා පාර අබලන් වුණා. වහිනකොට වතුර සේරම යන්නේ පාර මැද. දැන් පාර මැද හරියට ඇළවල් කපලා වගේ. මේ පාර ඩෝසර් කරලා හොඳට හදලා තිබුණා. හැබැයි කාපට් කළේ නැහැ. ලංකාවේ කැලෑවලට යන පාරවලුත් කාපට් කළා. ඒත් මිනිස්සු 500ක් විතර ඉන්න, වාහන සියගණනක් භාවිතා කරන මේ පාර කාපට් කරන්න කවුරුවත් කටයුතු කළේ නැහැ. අපිට මේ පාර හදලා දෙන්න කියලා අලුත් රජයෙන් ඉල්ලනවා.
රාජාංගණය සමූහ නුවන් කුමාර
