ජාත්‍යන්තර කැරම් ක්‍රීඩාව උඩුයටිකුරු කරමින් ලෝක කැරම් ශූරිය බවට පත්වූ ඉන්දියාවේ 18 හැවිරිදි කාසිමා බාෂාට තමිල්නාඩු රජයෙන් රුපියල් කෝටියක මුදලක් පිරිනැමූ බව ඉන්දීය මාධ්‍ය වාර්තා කරයි.
පසුගිය වසරේ අගභාගයේ අමෙරිකාවේ සැන් ෆ්‍රැන්සිස්කෝ නුවර පැවති 6 වැනි ලෝක කැරම් ශූරතාවලියේදී ඇය කාන්තා ඒකල ශූරතාව දිනා ගත් ලොව ළාබාලතම ක්‍රීඩිකාව ලෙස ඉතිහාසයට එක්වූවාය. චෙන්නායි නුවර දරිද්‍රතාව අතින් අන්තිම පහළ මට්ටමක පසුවන දිළිඳු පවුලක උපන් මේ දිරිය දියණියගේ පියා ත්‍රිරෝද රථ රියැදුරකු වන අතර, ඉන්දියාවේ හිටපු කනිෂ්ඨ කැරම් ශූරයකු ද වන බව ඉන්දීය මාධ්‍ය වැඩිදුරටත් වාර්තා කරයි.
අගහිඟකම් මධ්‍යයේ කුලී නිවෙසක ජීවත්වෙමින් ලෝක කැරම් ක්‍රීඩාව දිග්විජය කිරීමට ඇය සමත්වූයේ පියාගෙන් ලැබූ ගුරුහරුකම්වලින් සහ දිනකට පැය 12ක කාලයක් පුහුණුවීම් කිරීමේ ප්‍රතිඵලයකින් බව ඉන්දීය මාධ්‍ය සඳහන් කරයි. තමිල්නාඩු රජයෙන් ලැබුණු රුපියල් කෝටියක මුදල සිය පවුලට නව නිවසක් මිල දී ගැනීමට වැය කරන බව ඇය ප්‍රකාශ කර තිබේ. ලෝක කැරම් ශූරතාවලියේ කාන්තා ඒකල ශූරතාවට අමතරව ඇය මිත්‍රා විජය බාස්කර් සමඟ එක්ව කාන්තා යුගල ශූරතාවත් දිනා ගත්තාය. ඇය එම ශූරතාවලියේ කාන්තා කණ්ඩායම් ශූරතාව දිනූ ඉන්දීය කණ්ඩායමේද සාමාජිකාවක වූවාය.
