යුද සමයේදී යාපනයේ ආරක්ෂාව වෙනුවෙන් දිස්ත්‍රික්කයේ ඉඩම් අක්කර 2642.29ක ප්‍රමාණයක් ආරක්ෂක අංශ විසින් අත්පත් කරගෙන ඇති අතර, එම ඉඩම් මේ වන විට ආරක්ෂක කටයුතු සඳහා අවශ්‍ය නොවන බැවින් එම ඉඩම් පියවරෙන් පියවර නිදහස් කිරීමට ආරක්ෂක අමාත්‍යාංශය කටයුතු යොදා තිබේ. ඒ අනුව නිදහස් කෙරෙන ඉඩම් ඒවායෙහි වැසියන් යළි පදිංචි කරවීම පිණිස යාපනය දිසාපති කාර්යාලයේ ඉඩම් පරිහරණ කමිටුව වෙත භාර දීමට නියමිතව ඇත.
පසුගියදා ජනාධිපතිවරයාගේ ප්‍රධානත්වයෙන් යාපනයේ දිස්ත්‍රික් සංවර්ධන කමිටු රැස්වීම පැවති අවස්ථාවේද මෙම ඉඩම් නිදහස්කොට දෙන ලෙස මන්ත්‍රීවරුන්ගෙන් හා රාජ්‍ය නිලධාරින්ගෙන් ඉල්ලීමක් ඉදිරිපත් වී තිබුණි. එම අවස්ථාවේදී ජනාධිපතිවරයා ආරක්ෂාවට අවශ්‍ය නොවන ඉඩම් නිදහස් කිරීමට පියවර ගන්නා බවට සහතික වූ අතර, එහි ප්‍රතිඵලයක් වශයෙන් එම ඉඩම් ප්‍රමාණය ගණන් බලන ලෙස යාපනය දිසාපති කාර්යාලයට උපදෙස් ලැබී තිබේ.
ඒ අනුව සිදු කරන ලද ගණනය කිරීම්වලදී ආරක්ෂක අංශ විසින් යාපනයේ ආරක්ෂාව වෙනුවෙන් යාපනයේ වැසියන්ගෙන් මෙම ඉඩම් ප්‍රමාණය අත්පත් කරගෙන ඇති බවට තොරතුරු අනාවරණය වී තිබේ.
