කොළඹ මහ නගර සභාවේ හිටපු නාගරික කොමසාරිස්වරයකුගේ ගෙල බැඳි පවුම් 5ක රන් මාලයක් ඔහුගේ වෙළෙඳසලට පැමිණි කොල්ලකරුවන් දෙදෙනකු විසින් කඩාගෙන යෑමේ සිද්ධියක් බණ්ඩාරගම පොලීසියෙන් වාර්තා වෙයි. කීරි සම්බා තිබේදැයි අසමින් වෙළෙඳසලට හිස් ආවරණ ද සහිතව පැමිණෙන එක් කොල්ලකරුවකු හිටපු නාගරික කොමසාරිස්වරයාගේ ගෙල බැඳි ලක්ෂ 10ක් වටිනා පවුම් 5ක රන්මාලය කඩාගෙන දිව ගොස් ඇති අතර, ඔහු පසුපස පන්නමින් හිටපු කොමසාරිස්වරයා ඔහුට දිගින් දිගටම පහර දී තිබේ. තවත් කොල්ලකරුවකු යතුරුපැදියක පාරේ රැඳී සිට ඇති අතර, මාලය කඩාගත් කොල්ලකරුවා දිව ගොස් යතුරුපැදියට නඟින අතරවාරයේදී හිටපු කොමසාරිස්වරයා කොල්ලකරුට පා පහර දෙමින් කොල්ලකරු අල්ලා ගැනීමට උත්සාහ දරන අයුරු සීසීටීවී දර්ශනවල සටහන්ව තිබේ.
මේ සම්බන්ධයෙන් පැමිණිල්ලක් හිටපු කොමසාරිස්වරයා විසින් බණ්ඩාරගම පොලීසියට ඉදිරිපත් කර තිබෙන අතර, මේ සිද්ධිය බණ්ඩාරගම කොතලාව ප්‍රදේශයේ ඔහුට අයත් වෙළෙඳසලේ සිදුව ඇත. පැමිණිලිකාර විශ්‍රාමික නාගරික කොමසාරිස්වරයා ඔහුට අයත් බණ්ඩාරගම කොතලාවල ප්‍රදේශයේ වෙළෙඳසලේ සිටියදී කඩේට පැමිණි පුද්ගලයකු කීරී සම්බා තිබෙනවාදැයි අසා ඇතැයි පොලීසිය කියයි. සම්බා නැති බවට පැවසීමෙන් අනතුරුව ඒ පුද්ගලයා අයිස් පැකට් දෙකක් ඉල්ලා ඇති අතර, රෝස පාට අයිස් පැකට් දෙක ලබාදීමෙන් අනතුරුව කොළ පාට එකක් ලබාදෙන ලෙස පුද්ගලයා කළ ඉල්ලීම මත එය ලබාදීමට ශීතකරණය අසලට ගොස් මඳක් පහත්වී එහි දොර විවෘත කිරීමේදී පැමිණි පුද්ගලයා එකවරම ඔහුගේ ගෙල බැඳි රන් මාලය කොල්ලකා ඇතැයි පොලීසිය කියයි. ක්ෂණයකින් කොල්ලකරු වෙළෙඳසලේ ඉදිරිපිට තවත් පුද්ගලයකු නතර කරගෙන සිටි යතුරුපැදියේ නැඟී පලා යාමට උත්සාහ කිරීමේදී පසුපස හඹා ගිය කොමසාරිස්වරයා කොල්ලකරුට පා පහරක් එල්ල කර ඇති අතර, එම පහහරින් කොල්ලකරු බිම වැටී යළි නැඟිට යතුරුපැදියේ නැඟීමත් සමඟම කොල්ලකරුවන් දෙදෙනා පලා ගොස් ඇතැයි පොලීසිය කියයි.
සීසීටීවී දර්ශන ඔස්සේ කළ විමර්ශනවලදී කොල්ලයෙන් අනතුරුව කොල්ලකරුවන් දෙදෙනාම බණ්ඩාරගම දෙසට පලා ගොස් ඇතැයි පොලීසිය කියයි.
කොල්ලකරුවන් හඳුනා ගැනීමට පොලීසිය මහජන සහාය පතයි. බණ්ඩාරගම පොලීසියේ ස්ථානාධිපති ප්‍රධාන පොලිස් පරීක්ෂක තුෂාර ද සිල්වා මහතාගේ උපදෙස් මත අපරාධ විමර්ශන අංශයේ ස්ථානාධිපති පොලිස් පරීක්ෂක සරත් ජයලාල් මහතා ඇතුළු කණ්ඩායමක් පරීක්ෂණ පවත්වති.
