ජනප්‍රිය ගායන ශිල්පියෙකු, සංගීත අධ්‍යක්ෂවරයෙකු, ගීත රචකයෙකු වූ සිසිර සෙනාරත්නයන් වෙනුවෙන් ‘නිල්මිණි දෑසේ’ නමින් සංගීත ප්‍රසංගයක් පැවැත්වීමට කටයුතු යොදා ඇත. මෙය සංවිධානය කරනු ලබන්නේ පැරණි හින්දි චිත්‍රපට සහ ගීත රසික සමාජය විසිනි. ‘නිල්මිණි දෑසේ’ ගී ප්‍රසංගය පෙබරවාරි 09 වන දින පෙ.ව 9.00ට කොළඹ මහජන පුස්තකාල ශ්‍රවණාගාරයේදී නොමිලේ පැවැත්වේ. එදිනට සිසිර සේනාරත්නයන්ගේ නිර්මාණ ඇතුළත් පැරණි සිංහල චිත්‍රපට සහ ගුවන්විදුලි ගීත රසිකයන්ට රස විඳීමට අවස්ථාව සලසා ඇත.
ඕලු නෙළුම් නෙරිය රඟාලා, සීත දියරැළි, නුහුරු නුපුරුදු , මාගේ පුතුට මල්, ගයා ගීතයන් ගමේ වැනි ජනප්‍රිය ගීත රැසක් සංගීත ලොවට දායාද කළ සිසිර සේනාරත්නයන් 2015 පෙබරවාරි 4 දින තම ජීවන ගීතයට සමුදුන්නේය.
‘බ්ලු’ ප්‍රසංගය අදයි
යුද හමුදා ඉන්දියානු නර්තන අංශයේ අධ්‍යක්ෂිකා මේජර් වෙරෝනිකා දසනායකගේ ඒක පුද්ගල කථක් ප්‍රසංගය ‘බ්ලු’ ප්‍රසංගය අද 07 වැනිදා කොළඹ සෞන්දර්ය විශ්වවිද්‍යාලයීය පණිභාරත රංග ශාලාවේදී ප.ව. 06.30ට පැවැත්වේ. ප්‍රසංගය හරහා දේශගුණික විපර්යාස පිළිබඳ දැනුම්වත් කිරීම හා කතිකාවක් ඇති කිරීම ද ඇයගේ එක් අරමුණක් වේ. විශේෂ ආරාධිත අමුත්තන් හා කලාකරුවන් රැසකගේ සහභාගිත්වයෙන් විශේෂ ආරාධිත ප්‍රසංගයක් ලෙස මෙය පැවැත්වේ.
විජය සිනමා 16 සිට
ශ්‍රී ලාංකේය සිනමා අඹරේ පෑයූ සදා අනුස්මරණීය තරුව, මානව දයාවේ ප්‍රතිමූර්තිය වන ආදරණීය විජය කුමාරතුංග නම් වූ විශිෂ්ට රූපවේදියාණන් හට උපහාර පිණිස එතුමාගේ නමින් ඉදිකළ මිනුවන්ගොඩ ‘විජය සිනමා ශාලාව’ අභිනවයෙන් ජනගත කිරීම පෙබරවාරි 16 දින සවස 06ට පමණ සිදු කෙරේ.
2019 ජූලි මාසේ දවසක් 11 දා
සම්මානිත නාට්‍යවේදී රාජිත දිසානායක රචනා කොට අධ්‍යක්ෂණය කළ ‘2019 ජූලි මාසේ දවසක්, එළැඹෙන 11 වැනිදා ගාල්ල හෝල් ඩී ගෝලි ශාලාවේදී වේදිකාගත කෙරේ. පාසල් සිසුන්ට සහ ප්‍රේක්ෂකයන්ට මෙය නොමිලේ රඟ දක්වනු ලබයි. ජයනි සේනානායක, අනුරාධ මල්ලවාරච්චි, සම්පත් ජයවීර, උමාලී තිලකරත්න, ප්‍රසාදනි අතපත්තු, ගිහාන් ඩී. චිකේරා, ලිහාන් මෙන්ඩිස් සමඟ අනුජ් ප්‍රනාන්දු රංගනයෙන් එක්වෙති. සංගීත අධ්‍යක්ෂණය මිහිර දිසානායක ගෙනි.
නරි බෑනා, ජසයා සහ ලෙන්චිනා හෙට
දයානන්ද ගුණවර්ධන නාට්‍ය නිර්මාණයක් වන නරි බෑනා, ජසයා සහ ලෙන්චිනා හෙට දර්ශන වාර දෙකක් එල්ෆින්ස්ටන් රඟහලේහිදී වේදිකාගත කෙරේ.
ලොක්කා ලෙඩ වෙලා 09 දා
ගිහාන් ප්‍රනාන්දු නාට්‍ය නිර්මාණයක් වන “ලොක්කා ලෙඩ වෙලා” පෙබරවාරි 09 වැනිදා කොළඹ බිෂොප් විදුහල් රඟහලේදී සවස දර්ශන වාර දෙකක් වේදිකා ගත කෙරේ.
සෞන්දර්ය කලා විශ්වවිද්‍යාලයෙන් කතක් නර්තන සන්ධ්‍යාවක්
දේශගුණික විපර්යාසවලින් ලෝකය බේරාගන්න එන්නැයි පණිවුඩය ජනතාවට ඉදිරිපත් කිරීමේ අරමුණ ඇතිව සෞන්දර්ය කලා විශ්වවිද්‍යාලය කතක් නර්තන සන්ධ්‍යාවක් සෞන්දර්ය කලා විශ්වවිද්‍යාලයීය පනීබාරත් රංගශාලාවේදී අද (07) සවස 6.30 සිට 7.30 දක්වා පැවැත්වේ.
දේශගුණික විපර්යාස හේතුවෙන් ප්‍රචණ්ඩකාරී ළැව් ගිනි, ජල ගැලීම්, අයිස් කුණාටු, සුළි සුළං වැනි ව්‍යසනයන්ට ලෝකවාසීන් තරාතිරමක් නොබලාම අපමණ පීඩාවන්ට මුහුණ දෙමින් සිටින සමයක එම විපර්යාසයන් පිළිබඳ ලෝකයේ අවධානය යොමුකරන්නට කලා නිර්මාණවලටද හැකි බව නොරහසකි.
මෙහිදී සම්භාව්‍ය, ෆියුෂන්, සමකාලීන සහ සුෆි යන කථක නර්තනයන් ඉදිරිපත් කරනු ලැබේ.
අමාත්‍යවරුන්, ජ්‍යෙෂ්ඨ කලාකරුවන්, මහාචාර්යවරුන්, සෞන්දර්ය කලා විශ්වවිද්‍යාලයේ උපකුලපතිවරයාගේ සහ ජ්‍යෙෂ්ඨ හමුදා නිලධාරින්ගේ ප්‍රධානත්වයෙන් පැවැත්වෙන මෙම නර්තන සන්ධ්‍යාවේ නර්තන සහාය වෙරෝනිකා දිසානායකගේ නර්තන කණ්ඩායමේ සම සාමාජික තුෂාර සේනානායකගෙනි. වැඩසටහන් කළමනාකරණය සහ වේදිකා සම්බන්ධීකරණය කථිකාචාර්ය දර්ශන ප්‍රියන්ත, අනුග්‍රහය ස්කෙලෑස් හයර් එඩියුකේෂන්හි දිශානි දනුෂිකාය. ආලෝකකරණය කථිකාචාර්ය අජිත් කුමාර, ඇඳුම් නිර්මාණ සනි පෙරේරා සහ හැඩගැන්වීම නිකි සේරා විසින් සිදු කරනු ලබති.
ඉරෝෂා දීපානි
වෙස් පැලඳවීමේ උත්සවයක්
කඩවත ගල් ඒදණ්ඩ ජිනාදරී කලායතනයේ හිස වෙස් පැලඳවීමේ උත්සවය 15දා අලුයම ගල්ඒදණ්ඩ පුරාණ රජමහා විහාරස්ථානයේදී නර්තනාචාරිණී, ජනාදරී සේනානායකගේ මෙහෙයවීමෙන් පැවැත්වීමට නියමිතය
වාරියපොළ අනුනාහිමි සිනමාවට
උතුම් දළදා වහන්සේත්, සම්බුද්ධ ශාසනයත්, සිංහල ජාතියත් රැකගැනීමට වනගත වී සිට සිර අඩස්සියට නියමවූ අස්ගිරි පාර්ශ්වයේ අනුනායක මහා වීරවර බුද්ධ පුත්‍ර වාරියපොළ අනුනාහිමිපාණන් වහන්සේගේ අපදානය සිනමාවට ගෙන ඒමට මේ වන විට සියලු කටයුතු සූදානම් කර ඇත.
‘වාරියපොළ අනුනාහිමි’ නමින් නම්කොට ඇති මෙම සිනමාපටය මහාචාර්ය පූජ්‍ය තුඹුල්ලේ සීලක්ඛන්ධ හිමිපාණන් වහන්සේ විසින් රචිත වාරියපොළ මාහිමි කෘතිය ඇසුරෙන් නිර්මාණය වේ. ‘වාරියපොළ අනුනාහිමි’ සිනමාපටය අධ්‍යක්ෂණය කරනු ලබන්නේ කලා කීර්ති ශ්‍රී සනත් අබේසේකරයන් විසිනි. මහින්දාගමනය (2011), ශ්‍රී දළදාගමනය (2014), අනගාරික ධර්මපාල ශ්‍රීමතාණෝ (2014), මහරජ අජාසත් ( 2015), ගුත්තිල (2023) මින් පෙර ඔහු විසින් අධ්‍යක්ෂණය කළ සිනමාපට වේ. මෙහි අර්ථපති වශයෙන් කටයුතු කරනු ලබන්නේ ආචාර්ය සුමින්ද ලෝව්ය. ‘වාරියපොළ අනුනාහිමි’ ඔහුගේ දෙවෙනි සිනමා නිෂ්පාදනය වේ. මෙහි මූලික වැඩකටයුතු පසුගියදා කන්ද උඩරට මල්වතු අස්ගිරි මහා නාහිමිවරුන්ගේ අනුශාසනා සහ ආශිර්වාද මැද ආරම්භ කෙරිණ. විශ්ව ලංකා, පබෝධා සංදීපනී, නිලන්ති ඩයස් ඇතුළු රංගන ශිල්පීහු රැසක් මෙහි රංගනයෙන් දායක වෙති.
වාරියපොළ අනුනාහිමි සිනමාපටයේ ප්‍රධාන චරිතයක් වන්නේ කපුවත්තේ මහා අදිකාරම්වරයාගේ චරිතයයි. එම චරිතය නිරූපණය කරනු ලබන්නේ එතුමාගේ මී මුනුබුරා වන ශ්‍රීමත් විෂ්වකීර්ති සර් ජයන්ත කපුවත්තයි. ඔහු ගෝලීය රාජ්‍යතාන්ත්‍රික කවුන්සිලයේ ජ්‍යෙෂ්ඨ උපදේශක වශයෙන් කටයුතු කරයි.
නයනාංජලී
කැලණි පාලම 10 දා
ආර්.ආර්. සමරකෝන් නාට්‍යය නිර්මාණයක් වන රම්‍යා වනිගසේකර නව නාට්‍ය නිර්මාණයක් ලෙස ගෙන එන ‘කැලණි පාලම’ වේදිකා නාට්‍යය එළැඹෙන 10 වැනිදා සියනෑ ජාතික පාසලේදී සන්ධ්‍යාවේ දර්ශන වාර දෙකක් වේදිකාගත ෙකරේ.
අපේක්ෂාවේ වේදිකා මංගල්‍යය 11 සිට 20 දක්වා
බුද්ධ ශාසන, ආගමික සහ සංස්කෘතිය කටයුතු අමාත්‍යාංශය යටතේ ක්‍රියාත්මක ටවර් හෝල් රඟහල පදනම විසින් පස්වැනි වරටත් සංවිධානය කරනු ලබන අපේක්ෂාවේ වේදිකා මංගල්‍යය, ටවර් නාට්‍ය උලෙළ මේ මස 11 වැනි දින සිට 20 වැනිදා දක්වා මරදාන එල්ෆින්ස්ටන් හා ටවර් රඟහල්වලදී වේදිකා ගත කිරීමට කටයුතු සූදානම් කර ඇත.
මෙවර නාට්‍ය උලෙළේදී පුරා දින දහයක් තුළ දිගු නාට්‍ය 14ක්, කෙටි නාට්‍ය 12ක් හා ළමා නාට්‍ය 8ක් වශයෙන් නාට්‍ය 34ක් දර්ශන වාර 68ක් ප්‍රේක්ෂකයන්ට රසවිඳීමට ටවර් හෝල් පදනම කටයුතු යොදා ඇත. මේ තාක් ටවර් හෝල් පදනම උපයාගත් ආදායමෙන් රුපියල් ලක්ෂ විසිපහක් මෙවර නාට්‍ය උලෙළ සඳහා වැය කිරීමට ද නියමිතය. ඉදිරිපත් කරවනු ලබන සෑම නාට්‍යයක් සඳහාම ටවර් හෝල් පදනම විසින් ශාලා පහසුකම් නොමිලේ සැපයිමට සියලු කටයුතු සූදානම් කරනු ලබයි.
නාට්‍යය ජනතාව අතර ප්‍රචලිත කිරීම, නාට්‍ය නැරැඹීම සඳහා ප්‍රේක්ෂකයා උනන්දු කරවීම හා ජනතා ආකර්ෂණය රංග ශාලා වෙත ගෙන ඒම අරමුණු කර ගනිමින් අපේක්ෂාවේ වේදිකා මංගල්‍යය ටවර් නාට්‍ය උලෙළ වෙනුවෙන් මෙම මස 10 වැනි දින නාට්‍ය පෙරහැරක් සංවිධානය කිරීම ද සිදු කරනු ලබයි.
මෙම පෙරහැර සඳහා නාට්‍යකරුවන්, කලාකරුවන්, ටවර් නාට්‍ය හා රංග කලා පාසලේ ශිෂ්‍ය ශිෂ්‍යාවන් හා ටවර් හෝල් රඟහල පදනමේ කාර්යය මණ්ඩලය සහභාගි වීමට නියමිතය. මෙවර නාට්‍ය උලෙළ පැවැත්වෙන දින දහය පුරාවට ටවර් කලා ශිල්පීන් දෙපළ බැගින් ශිල්පීන් විසිදෙනෙකුට ජීවිතේ එක් වරක් පමණක් පිරිනමන ටවර් හෝල් උපහාර සම්මානය පිරිනැමීමටත් මූල්‍යමය තිළිණයක් ප්‍රදානය කිරීමටත් ටවර් හෝල් රඟහල පදනම කටයුතු සංවිධානය කර ඇත.
