තමා දුටු යතුරුපැදි අනතුරක් ගැන මුහුණුපොතේ සටහනක් තැබූ තරුණයකු ඊට පසු දින යතුරුපැදි අනතුරකින්ම මියගොස් ඇත.
මෙසේ මියගොස් ඇත්තේ අංක 76, වහටියගම තුඩැල්ල, ජාඇළ පදිංචි එච්. චාමික ප්‍රනාන්දු (22) නමැති තරුණ‍ෙයකි.
සිය මිතුරකු සමඟ යතුරුපැදියකින් ගමන් කරමින් සිටිය දී පමුණුගම උස්වැටකෙයියාව ප්‍රදේශයේ දී පසුගිය 03 දා යතුරුපැදිය මාර්ගයෙන් ඉවතට පැන අසල තාප්පයක හා විදුලි පහන් කණුවක ගැටී මෙම අනතුර සිදුව ඇත.
මෙම තරුණයා සමඟ යතුරුපැදියේ ගමන් ගත් ඔහුගේ මිතුරා බරපතළ තුවාල ලබා කොළඹ ජාතික රෝහලට ඇතුළත් කර ඇත. ඔහුගේ තත්ත්වය ද බරපතළය.
චාමික ප්‍රනාන්දු අනතුරින් මිය යන්නට දිනකට පෙර සිය මුහුණුපොතෙහි රිය අනතුරකින් තරුණයකු මිය යන අයුරුත් එයින් මිය යන තරුණයාගේ මව දැඩි කම්පනයකට පත් වන අයුරුත් ගැන යම් සටහනක් ද තබා තිබී ඇත.
මෙම අනතුර වූ දින කුරුලුකැලේ දේවස්ථානයට ගොස් ඇති චාමික නි‍ෙවසට පැමිණ තම මවට පවසා ඇත්තේ සිරිපාදේ යෑම සඳහා සපත්තු ජෝඩුවක් රැගෙන ඒමට යන බවයි.
එලෙස නි‍ෙවසින් නික්ම ගිය චාමික ගැන නිවැසියන්ට තොරතුරක් ලැබෙන්නේ එදින රාත්‍රී කාලයේදී ය. ඒ යතුරුපැදි අනතුරකින් ඔහු මියගොස් ඇති බව සඳහන් කරමිනි.
ඔහුගේ මෘත ශරීරය පමුණුගම රෝහලේ ඇති බව ද කියැවිණි. ඒ අනුව පවුලේ ඥාතීන් රෝහලට ගොස් සිරුර හඳුනාගෙන ඇත. මියගිය චාමික ප්‍රනාන්දුගේ දේහය පිළිබඳ අවසන් කටයුතු ඊයේ (05) දඬුගම ලංකා සභා දේවස්ථාන සුසාන භූමියේ දී සිදු කිරීමට නියමිතව තිබුණි. අනතුර සම්බන්ධයෙන් වැඩිදුර විමර්ශන කටයුතු බෝපිටිය පොලීසිය මඟින් සිදු කරයි.
ජාඇළ සමූහ – ප්‍රසංග පෙරේරා
