නව අධ්‍යයනයකට අනුව, ඉහළම මානව ඝනත්වය සහ ගෝලීය ව්‍යාඝ්‍ර වාසස්ථානවලින් 18%ක් පමණක් තිබියදීත්, මේ වන විට ලොව විශාලතම ව්‍යාඝ්‍ර ගහණය සිටින්නේ ඉන්දියාවේ බව අනාවරණය වී ඇත. දශකයකට මදක් වැඩි කාලයක් තුළ ඉන්දියාව සිය ව්‍යාඝ්‍ර ගහණය 3,600ක් දක්වා දෙගුණ කරගෙන ඇති අතර එය ලෝකයේ ව්‍යාඝ්‍ර ගහණයෙන් සියයට 75කි.මෙම ගහණය මේවන විට වර්ග කිලෝමීටර් 138,200ක්, එනම් එක්සත් රාජධානියේ ප්‍රමාණයෙන් අඩක් පමණ භූමියක මිලියන 60 ක පමණ ජනතාවක් සමඟ වාසය කරති.
දඩයම් කිරීමෙන් සහ වාසස්ථාන අහිමිවීමෙන් ආරක්ෂා කිරීම, ගොදුරු සුරක්ෂිත කිරීම, මිනිස්-වනජීවී ගැටුම් අවම කිරීම සහ ප්‍රාදේශීය ප්‍රජාවන් නඟාසිටුවීමෙන් මෙය කළ හැකි වී ඇති බව ප්‍රමුඛ පෙළේ පර්යේෂණ සඟරාවක් වන Science හි ප්‍රකාශයට පත් කරන ලද මෙම අධ්‍යයනයෙන් අනාවරණය වෙයි.
“අපි හිතන්නේ මිනිස් ඝනත්වය විශාල මාංශ භක්ෂක සතුන් (ව්‍යාඝ්‍රයන් වැනි) සංරක්ෂණයට අහිතකර බවයි. නමුත් ඝනත්වයට වඩා වැදගත් වන්නේ මිනිසුන්ගේ ආකල්පයයි,” අධ්‍යයනයේ ප්‍රධාන කතුවරයා වන යාද්වේන්ද්‍රදේව් වික්‍රම්සිං බීබීසීයට පවසා තිබුණි. ඔහු උදාහරණයක් ලෙස මැලේසියාව උපුටා දක්වමින්, ආර්ථික වශයෙන් සමෘද්ධිමත් වූවත්, ඉන්දියාවට වඩා අඩු ජනඝනත්වයක් තිබියදීත්, ව්‍යාඝ්‍ර ගහණය සාර්ථකව පුනර්ජීවනය කර නැතැයි පෙන්වා දෙයි.
ඉන්දියාවේ ව්‍යාඝ්‍ර ප්‍රතිසාධනය මඟින් බිලාල වර්ගයේ විශාල සතුන් ආරක්ෂා කිරීමට, ජෛව විවිධත්වය ඉහළ නැංවීමට සහ ප්‍රජාවන්ට සහාය විය හැකි ආකාරය පිළිබඳ ලෝකයට පාඩමක් උගන්වන බව පර්යේෂකයෝ විශ්වාස කරති. ඉන්දියාව 2006 සිට, ප්‍රාන්ත 20ක් පුරා සෑම වසර හතරකට වරක් ව්‍යාඝ්‍ර වාසස්ථාන සමීක්ෂණය කර ඇති අතර, විශාල බළලුන්, සම-විලෝපිකයන්, ගොදුරු සහ වාසස්ථානවල ගුණාත්මකභාවය බෙදා හැරීම අධීක්ෂණය කරයි.එම කාලය තුළ එහි ව්‍යාඝ්‍ර වාසස්ථාන 30% කින් වර්ධනය වී ඇත.එය වාර්ෂිකව වර්ග කිලෝමීටර් 2,929 ක් පමණ වේ.ව්‍යාඝ්‍රයින් සමඟ සහජීවන මට්ටම ඉන්දියාව පුරා වෙනස් වන අතර, ආර්ථික විද්‍යාව, සමාජ සැකසුම් සහ සංස්කෘතික සාධක මත බලපෑම් ඇති වන බව පර්යේෂකයෝ පෙන්වාදෙති.
මධ්‍ය ප්‍රදේශ්, මහාරාෂ්ට්‍ර, උත්තරාකාන්ද් සහ කර්ණාටක වැනි ප්‍රාන්තවල ව්‍යාඝ්‍රයන් ඉහළ ඝනත්වයකින් යුත් මිනිසුන් සමඟ අවකාශය බෙදා ගනී. ඔඩීෂා, චත්තිස්ගාර්, ජාර්කන්ඩ් සහ ඊසානදිග ඉන්දියාව වැනි දඩයම් කිරීමේ හෝ දඩයම් කිරීමේ ඉතිහාසයක් ඇති ප්‍රදේශවල, ව්‍යාඝ්‍රයන් නැති වී හෝ වඳ වී ගොස් ඇත. මෙම ප්‍රදේශ වලට ඉන්දියාවේ දුප්පත්ම දිස්ත්‍රික්ක කිහිපයක්ද ඇතුළත් වේ. වෙනත් වචනවලින් කිවහොත්, පර්යේෂකයන් සටහන් කරන්නේ, ව්‍යාඝ්‍රයන් ආශ්‍රිත සංචාරක ව්‍යාපාරයෙන් සහ ගැටුම් අලාභ සඳහා රජයෙන් වන්දි ලබා දෙන ආර්ථික වශයෙන් සමෘද්ධිමත් ප්‍රදේශවල මිනිසුන් සමඟ ව්‍යාඝ්‍රයන්ගේ සහජීවනය ප්‍රශස්ත මට්ටමින් දක්නට ලැබෙන බවයි.
පර්යේෂකයන් පවසන්නේ පරිසර පද්ධති තිරසාර ලෙස භාවිතා කිරීම තුළින් ආර්ථික සමෘද්ධිය කොටියන් යථා තත්ත්වයට පත් කිරීමට උපකාරී වන බවයි.
වෙනුර කණිෂ්ක BBC ඇසුරිණි
කවර නිර්මාණය
ගන්දික ධර්මබන්දු
පිටු සැකසුම
දීපාල් සංජීව සරත්මදු
