සීත ඍතුවත් සමඟ එංගලන්තයේ එච්.එම්.පී.වි. වයිරසය වාර්තාගත අයුරින් ඉහළ ගොස් ඇතැයි බ්‍රිතාන්‍ය සෞඛ්‍යාරක්ෂක ඒජන්සියේ සංඛ්‍යාලේඛනවලින් හෙළි වී තිබේ. එම සංඛ්‍යාලේඛනවලට අනුව එරට රෝහල් 20කින් අවම වශයෙන් එක් රෝහලක එච්.එම්.පී.වී. වයිරසය ආසාදිත වූ රෝගියකු ප්‍රතිකාර ගන්නා බවත්, උණ හා සෙම්ප්‍රතිශ්‍යාවෙන් පෙලෙන්නේ නම් මුඛ ආවරණ පලඳින ලෙස වෛද්‍යවරු උපදෙස් ලබා දී ඇති බවත් විදෙස් මාධ්‍ය සඳහන් කරයි. මෙවර සීත ඍතුවත් සමඟ රටවල් රැසක එච්.එම්.පී.වී. වයිරසය ව්‍යාප්ත වෙමින් තිබෙන අතර, පෙරේදා ඉන්දියාවේ අහමදාබාද් නුවරින් වයිරසය ආසාදිත සිවු හැවිරිදි දරුවකු හඳුනා ගෙන ඇතැයි ද ටයිම්ස් ඔෆ් ඉන්ඩියා පුවත් සේවය වාර්තා කළේය. එම රෝගියත් සමඟ ගුජරාට් ප්‍රාන්තයෙන් වාර්තා වූ එච්.එම්.පී.වී. වයිරසය ආසාදනය වූවන්ගේ සංඛ්‍යාව 8 දක්වා ඉහළ ගොස් තිබේ.
එම වයිරසය චීනයෙන් ව්‍යාප්ත වූ බවට වාර්තා වීම හේතුවෙන් ඒ පිළිබඳ ලෝක සෞඛ්‍ය සංවිධානය චීනයෙන් වැඩිදුර තොරතුරු ඉල්ලා ඇති බවත්, චීනය මෙතෙක් එම තොරතුරු ලබා දී නැති බවත් විදෙස් මාධ්‍ය සඳහන් කළේය. කෙසේ වුවද නව වයිරසය චීනයේ පැතිරෙන බව එරට බෝවෙන රෝග පාලනය සහ වැළැක්වීමේ මධ්‍යස්ථානය පිළිගෙන ඇති බවත්, එය තත්ත්වය සාමාන්‍යයෙන් සීත ඍතුවේදී ව්‍යාප්ත වන රෝගී තත්ත්වයක් බවට ප්‍රකාශ කර ඇති බවත් විදෙස් මාධ්‍ය වැඩිදුරටත් සඳහන් කරයි.
