ඉන්දියාවේ ජනරජ දිනය නිමිත්තෙන් පසුගියදා ගුජරාට් ප්‍රාන්තයේ අහමදාබාද් නුවර නරේන්ද්‍ර මෝදි ක්‍රීඩාංගණයේ පැවැති ප්‍රසංගයත් සමඟ ලොව වැඩිම පිරිසක් නැරඹූ ප්‍රසංග චාරිකාවේ ගිනස් වාර්තාවට හිමිකම් කීමට ලෝක ප්‍රකට ‘Cold Play‘ රොක් සංගීත කණ්ඩායම සමත්වූ බව විදෙස් මාධ්‍ය වාර්තා කරයි. Hymn for the Weekend සහ Adventure of a Lifetime ඇතුළු ජනප්‍රිය ගීතවලින් ලොව පිනවූ බ්‍රිතාන්‍ය සංගීත කණ්ඩායමක් වන ‘කෝල්ඩ් ප්ලේ‘ වසර 2022 මාර්තු මාසයේ ආරම්භ කළ එම ප්‍රසංග චාරිකාව ලොව පුරා රටවල් රැසක ප්‍රසංග 100කට අධික සංඛ්‍යාවක් පවත්වා ඇති අතර, අහමදාබාද් ප්‍රසංගයත් සමඟ මිලියන 10.3ක නරඹන්නන් පිරිසක් ඔවුන්ගේ ප්‍රසංග නැරඹීමට පැමිණ ඇතැයි වාර්තා වේ.
මීට පෙර එම ගිනස් වාර්තාවට හිමිකම් කියනු ලැබුවේ අමෙරිකාවේ සුපිරි පොප් ගායිකා ටේලර් ස්විෆ්ට් වන අතර, වසර 2023 මාර්තුවේ සිට 2024 දෙසැම්බරය දක්වා පැවැති ඇගේ ලෝක ප්‍රසංග චාරිකාවට මිලියන 10.1ක නරඹන්නන් පිරිසක් සහභාගි වී තිබූ බව විදෙස් මාධ්‍ය වාර්තා කරයි. ‘කෝල්ඩ් ප්ලේ‘ ප්‍රසංග චාරිකාව නිමාවට පත්වීමට නියමිතව ඇත්තේ මේ වසරේ සැප්තැම්බර් 8 වැනිදා වන බැවින් තවත් වාර්තා රැසක් පිහිටුවනු ඇතැයි විදෙස් මාධ්‍ය සඳහන් කරයි.
කෝල්ඩ් ප්ලේ ඉන්දීය සංචාරයේදී මුම්බායි නුවර ඩී.වයි.පටිල් ක්‍රීඩාංගණයේ ප්‍රසංග 3කට සහ අහමදාබාද් නුවර නරේන්ද්‍ර මෝදි ක්‍රීඩාංගණයේ ප්‍රසංග 2කට සහභාගි වී ඇති අතර, ඉන් උපයා ගත් ආදායම අමෙරිකානු ඩොලර් මිලියන 50කට අධික බව ද වාර්තා වේ. මෝදි ක්‍රීඩාංගණයේ පැවැති ප්‍රසංගයත් සමඟ එය 21 වැනි සියවසේ විශාලතම ගෘහස්ථ සංගීත ප්‍රසංගය ලෙස ඉතිහාස ගත වූ බව වාර්තා වේ. එම ප්‍රසංග රාත්‍රීන් 2කටම සහභාගි වූ නරඹන්නන්ගේ සංඛ්‍යාව දෙලක්ෂ විසිදහසකට අධික බවත්, ඉන්දීය ප්‍රසංග ඉතිහාසයේ පැවැති විශාලතම සංගීත ප්‍රසංගය එය බවත් විදෙස් මාධ්‍ය වාර්තා කරයි. ඉන්දියාවේ ප්‍රසංග ආර්ථිකයක් නිර්මාණය කිරීමට වැඩි අවස්ථාවක් පවතින බවත්, එය විශාල වෙළෙඳපොළක් බිහි කරනු ඇති බවත් එම ප්‍රසංගයෙන් පසු ඉන්දීය අගමැති නරේන්ද්‍ර මෝදි ප්‍රකාශ කර තිබේ.
