අමෙරිකාවේ නව ජනාධිපති ඩොනල්ඩ් ට්‍රම්ප් මුණ ගැසීම සඳහා ඊශ්‍රායල අගමැති බෙන්ජමින් නෙතන්යාහු වොෂින්ටනයේ සංචාරයක් ආරම්භ කළ බව විදෙස් මාධ්‍ය වාර්තා කරයි. ගාසා තීරයේ ගැටුම් පිළිබඳ පසුගිය අමෙරිකානු පරිපාලනය සමඟ ඇතිකරගත් අර්බුද සමථයකට පත් කරන යළි සම්බන්ධතා ගොඩනඟා ගැනීම එම සංචාරයේ අරමුණ බව ද විදෙස් මාධ්‍ය වැඩිදුරටත් වාර්තා කරයි. මීට අමතරව ගාසා සටන් විරාමයේ දෙවැනි අදියර පිළිබඳ රාජ්‍ය නායකයන් අතර සාකච්ඡා පැවැත්වෙනු ඇතැයි ද වාර්තා වේ.
පසුගිය මාසයේදී අමෙරිකාවේ නව ජනාධීපති ලෙස දිවුරුම් දීමෙන් පසු ඩොනල්ඩ් ට්‍රම්ප් මුණ ගැසෙන පළමු විදෙස් රාජ්‍ය නායකයා ද නෙතන්යාහු වන අතර, මේ වන විට ගාසා තීරයට සති 6ක සටන් විරාමයක් සඳහා හමාස් සංවිධානය සමඟ එකඟතාවට පත්ව සිටින බැවින් නෙතන්යාහුගේ සංචාරය වඩාත් සාර්ථක වනු ඇතැයි අනාවැකි පළ වී තිබේ. ගාසා යුද්ධයේදී ඊශ්‍රායලය ගත් තීරණ මැදපෙරදිග මුහුණුවර වෙනස් වීමට හේතු වී ඇති බවත්, ඩොනල්ඩ් ට්‍රම්ප් සමඟ සමීපව කටයුතු කිරීමෙන් මැදපෙරදිග සිතියම ප්‍රතිනිර්මාණය කිරීමට හැකියාව ලැබෙනු ඇති බවත් සංචාරයට පිටත්වීමට පෙර ගුවන්තොටුපොළේ දී නෙතන්යාහු ප්‍රකාශ කර තිබේ.
