“මම මැරුණොත් උඹට කවුරුවත් නෑ, යන්න තැනක්, කියන්න කෙනෙක් නෑ කියලා මම දන්නවා. ඒත් දුවේ මගෙ ලෙඩේ මට දරා ගන්න බෑ. ඒ හින්දා මගේ කාලෙ ඉවරයි. මම යනවා.මට සමාවෙයන්” යනුවෙන් සිරුරේ පහළ කොටසේ ඇතිව තිබූ වේදනාකාරී රෝගයක් දරාගැනීමට නොහැකි වූ කාන්තාවක් සිය දියණියට ලිපියක් ලියා තබා දුම්රියට පැන සියදිවි හානි කර ගැනීමේ සිදුවීමක් වාර්තා වී ඇතැයි මහරගම පොලීසිය පවසයි.
මෙසේ මියගොස් ඇත්තේ පන්නිපිටිය, දෙපානම ප්‍රදේශයේ පදිංචි 51 හැවිරිදි දෙදරු මවක් බව පොලීසිය කියයි.
මරදාන සිට අවිස්සාවේල්ල දක්වා ධාවනය වූ මන්දගාමී දුම්රියකට මහරගම සහ පන්නිපිටිය අතර ප්‍රදේශයේදී පැන මේ කාන්තාව සියදිවි හානි කරගෙන තිබූ අතර, පසුව එම දුම්රියෙන්ම කොට්ටාව දුම්රිය ස්ථානයට මළ සිරුර රැගෙනවිත් භාරදී තිබේ.
පසුව මේ පිළිබඳව ලද තොරතුරකට අනුව පොලීසිය එම ස්ථානයට ගොස් මහරගම හදිසි මරණ පරීක්ෂක, සාම විනිසුරු ඩග්ලස් රූපසිරි මහතා කැඳවා ස්ථානීය පරීක්‍ෂණයක් සිදු කළ අතර, එහිදී මරණ පරීක්ෂකවරයා පොලීසියට නියෝග කර ඇත්තේ පශ්චාත් මරණ පරීක්ෂණය සඳහා දේහය හෝමාගම මූලික රෝහලට රැගෙන යන ලෙසයි.
දේහය පිළිබඳ හදිසි මරණ පරීක්ෂණය සිදුකරන අතරතුරදී මියගිය කාන්තාව විසින් ලියන ලද ලිපියක් ඇයගේ දියණිය විසින් ඉදිරිපත් කර තිබූ අතර එහි මෙලෙස සඳහන්ව තිබුණි.
“මොකක්ද මේ මගේ කරුම ජීවිතේ, උඹට වැඩකුත් නෑ, මමත් ජීවිත කාලයම දුක් විඳිනවා. මට දැන් එපා වෙලා තියෙන්නේ. ඒ නිසා පුතේ මම යනවා. මට සමාවෙයන්”
පසුව මෘත දේහය පිළිබඳ පශ්චාත් මරණ පරීක්ෂණය හෝමාගම මූලික රෝහලේ අධිකරණ වෛද්‍ය නිලධාරී, වෛද්‍ය වරුණා ජයසුන්දර මහත්මිය සිදු කළාය.
එහිදී අනතුරට ලක් වූ දුම්රියේ රියැදුරු කැඳවා ප්‍රකාශයක් සටහන් කරගන්නා තෙක් මියගිය කාන්තාවගේ මරණයට හේතුව නොදක්වා විවෘත තීන්දුවක් දීමට මහරගම හදිසි මරණ පරීක්ෂකවරයා නිගමනය කළේය.
සිද්ධිය සම්බන්ධයෙන් මහරගම පොලිස් ස්ථානාධිපති, ප්‍රධාන පොලිස් පරීක්ෂක චේලක රාජපක්ෂ මහතාගේ උපදෙස් මත පො. කො. (103484) ප්‍රමිත ඇතුළු නිලධාරීහු පරීක්ෂණ මෙහෙයවූහ.
කොට්ටාව – ප්‍රදීප් කුමාර
