අවුරුදු 13ක දැරියක අපයෝජනයට ලක් කළැයි 45 හැවිරිදි ගල්වළවල් හිමිකරුවකු අත්අඩංගුවට ගත් බව හංවැල්ල පොලීසිය පවසයි. අත්අඩංගුවට ගත් පුද්ගලයා කහහේන ප්‍රදේශයේ පදිංචිකරුවෙක් වන අතර මෙම සැකකරු හා අපයෝජනයට ලක්වූ දැරියගේ මව අතර අනියම් සම්බන්ධයක් පවත්වාගෙන ගොස් ඇත. මොහු නිතර නිතර එම නිවෙසට යන එන අයකු වන අතර දැරියගේ මවත් කිසිවකුත් නිවෙසේ නොමැති අවස්ථාවලදී මීට වසර තුන හතරක කාලයක දී මෙම සිද්ධියට දැරිය ගොදුරු වී තිබේ.
මවටත් සැකකාර ගල්වළවල් හිමිකරුටත් ඇති බිය නිසා දැරිය සිද්ධිය වසන් කර සිට ඇති අතර ඇය මැදවච්චිය ප්‍රදේශයේ පදිංචි තම මිත්තණියගේ නිවෙසට ගිය අවස්ථාවක දී ඇයට මෙම සිද්ධිය පවසා ඇත. පසුව ඔවුන් විසින් සිදු කළ පැමිණිල්ලක් අනුව සැකකාර ගල්වළවල් හිමිකරු අත්අඩංගුවට ගැනීමට ක්‍රියාකර තිබේ. දැරිය රෝහල්ගතකර වෛද්‍ය වාර්තාවක් ලබාගැනීමට නියමිත අතර සැකකරු අවිස්සාවේල්ල මහේස්ත්‍රාත් අධිකරණයට ඉදිරිපත් කිරීමට නියමිතය.
හංවැල්ල පොලීසිය වැඩිදුර පරීක්ෂණ කටයුතු මෙහෙයවයි.
