පාකිස්ථානු නාවික හමුදාව විසින් නවවැනි වරටත් සංවිධාන කරනු ලබන අමාන් – 2025 (AMAN – 2025) බහු පාර්ශ්වික අභ්‍යාසය සඳහා සහභාගීවීම‍ට ශ්‍රී ලංකා නාවික හමුදාව නියෝජනය කරමින්, ශ්‍රී ලංකා නාවික නෞකා විජයභාහු නෞකාව කොළඹ වරායෙන්
පාකිස්ථානයේ කරච්චි බලා ඊයේ (30) පිටත් වූ අතර, ශ්‍රී ලංකා නාවික නෞකා විජයභාහු නෞකාවද නාවික හමුදා සම්ප්‍රදායානුකූලව කොළඹ වරායෙන් පිටත් වීම සිදුකෙරිණි.
කලාපීය සහයෝගිතාව, ස්ථාවරත්වය සහ අන්තර් ක්‍රියාකාරිත්වය ප්‍රවර්ධනය කිරීම සහ 9 මුහුදු මංකොල්ලකෑම් ඇතුළු සමුද්‍රීය ත්‍රස්තවාදය සහ අපරාධ සඳහා සාමූහිකව ප්‍රතිචාර දැක්වීමේ අරමුණින් ‘අමාන්’
බහුපාර්ශ්වික අභ්‍යාසය පාකිස්ථානු නාවික හමුදාව විසින් 2007 වර්ෂයේදී ආරම්භ කර ඇත. ඒ අනුව, 2025 පෙබරවාරි මස 07 වැනි දින සිට 11 වැනි දින දක්වා පාකිස්ථානයේ කරච්චිහිදී පැවැත්වීමට නියමිත නවවැනි අමාන් – 2025 (AMAN – 2025) බහු පාර්ශ්වික අභ්‍යාසය සඳහා සහභාගී වීමට ශ්‍රී ලංකා නාවික නෞකා විජයභාහු නෞකාව මෙලෙස දිවයිනෙන් පිටත් විය.
මෙම අභ්‍යාසය සඳහා සහභාගීවීම මඟින් ශ්‍රී ලංකාව සහ පාකිස්ථානය අතර පවත්නා දිගුකාලීන මිත්‍රශීලී රාජ්‍ය තාන්ත්‍රික සබඳතා සහ ආරක්‍ෂක සහයෝගිතාව තවදුරටත් ශක්තිමත්ව වර්ධන වීමෙන්, ශ්‍රී ලංකා නාවික හමුදාවේ පුහුණු කටයුතු, විශේෂඥ තාක්‍ෂණික සහාය ඇතළු නාවික හමුදාවේ
හැකියාවන් වර්ධනය සඳහා නාවික හමුදාවට මහඟු පිටිවහලක් ගෙන දෙනු ඇත.
එමෙන්ම, කලාපීය හා කලාපීය නොවන නාවික හමුදා සහ සමුද්‍රීය පාර්ශ්වයන් ගණනාවක් සහභාගීවන මෙවැනි බහුපාර්ශවික අභ්‍යාස සඳහා සහභාගී වීම මඟින්, ශ්‍රී ලංකා නාවික හමුදාවට කලාපීය නාවික හමුදාවන් සමඟ අන්තර් ක්‍රියාකාරීත්වය සහ අන්‍යෝන්‍ය සහයෝගීතාව වර්ධනය කර ගැනීම, සමුද්‍රීය මෙහෙයුම් සම්බන්ධ නව දැනුම, කුසලතා ක්‍රමෝපායන් සහ අත්දැකීම් හුවමාරු කර ගැනීම, නව අභියෝග හඳුනාගැනීම සහ ඒ සඳහා සාමුහිකව විසදුම් සෙවීම හා ප්‍රතිචාර දැක්වීමට හැකිවීම වැනි ප්‍රතිලාභ රැසක් හිමි වනු ඇත.
