රුසියානු රජයෙන් ශ්‍රී ලංකාවට ලබා දුන් එම්.ඕ.පී. පොහොර මෙට්‍රික් ටොන් 55,000 අතරින් 50%ක්, (මෙට්‍රික් ටොන් 27,500ක්) සකස් කළ මිශ්‍ර පොහොර ලෙස පොල් වගාව සඳහා යොදා ගැනීමට කටයුතු යොදා ඇතැයි වැවිලි සහ ප්‍රජා යටිතල පහසුකම් අමාත්‍යාංශය කටයුතු යොදා තිබේ.
මෙම එම්.ඕ.පී. පොහොර ඍජුවම පොල් වගාව සඳහා භාවිත නොකර, එය යූරියා සහ එප්පාවල රොක් පොස්පේට් පොහොර සමඟ ත්‍රිත්ව මිශ්‍රණයක් ලෙස නිර්දේශිත අනුපාතයකට අනුව සකස් කර පොල් වගාව සඳහා යොදා ගැනීම සුදුසු බව පොල් පර්යේෂණ ආයතනය නිර්දේශ කර ඇත. ඒ අනුව එම මිශ්‍රිත පොහොර කිලෝ 50ක් සඳහා රුපියල් 9,000ක පිරිවැයක් දැරීමට පොහොර සංස්ථාවට සිදුවී තිබේ. නමුත් එම ආයතනය විසින් එම පොහොර මිශ්‍රණය පොල් වගාව සඳහා රුපියල් 3,700ක පිරිවැයකට ලබා දීමට කැමැත්ත පළ කර තිබේ. ඒ අනුව මෙම කිලෝ 50ක පොහොර මිටිය පොල් වගා කිරීමේ මණ්ඩලයේ මෙහෙයුම් පිරිවැය ද එකතු කර රුපියල් 4,000ක් වැනි පිරිවැයකට බෙදාහැරීම සඳහා සූදානම් කර ඇත.
මෙම පොල් වගාව වෙනුවෙන්ම සැකසූ කිලෝ 50ක පොහොර මිටියක් ලෙස පොල් වගාකරුවන් වෙත ලබා දීමට රුසියානු රජයේ අවසරය ලබා ගැනීමේ අරමුණින් එම බලධාරින් වෙත විදේශ කටයුතු අමාත්‍යාංශය හරහා වැවිලි සහ ප්‍රජා යටිතල පහසුකම් අමාත්‍යාංශ ලේකම් විසින් ලිපියකින් අදාළ ඉල්ලීම් සිදු කර ඇත.
පොල් වගාකරුවන්ට මෙම පොහොර ලබා දීමට අවශ්‍ය කැබිනට් පත්‍රිකාවක් සකස් කර ඇති අතර, රුසියානු රජය විසින් එම්.ඕ.පී පොහොර මිශ්‍රිත පොහොරක් ලෙස පිරිවැයෙන් 50% ක අඩු මුදලකට වගාකරුවන්ට ලබාදීමට අවසර ලබාදීමෙන් පසු පොල් වගා කිරීමේ මණ්ඩලය, පොල් පර්යේෂණ ආයතනය හා පොහොර සංස්ථාව විසින් මෙම පොහොර වගාකරුවන්ට ලබාදීමේ කටයුතු ආරම්භ කිරීමට සැලසුම් කර තිබේ. පොල් පර්යේෂණ ආයතනය හා පොල් වගා කිරීමේ මණ්ඩලය අනුමත කරනුයේ මෙම එම්.ඕ.පී. පොහොර මිශ්‍රිත පොහොර පොල් වගාකරුවන්ට ලබා දීමයි. එමගින් මෙම පොහොර පිරිවැයට ලබාදීම මඟින් රජය විසින් බලාපොරොත්තු වන අපේක්ෂාවන් වඩා සාර්ථක ලෙස ඉටු කර ගැනීමට හැකියාව පවතී. එනම්, එම මිශ්‍රිත පොහොර පොල් වගාව සඳහා පමණක් භාවිත කළ හැකි බැවිනි. එය වගාකරුවන්ට අවසාන වශයෙන් ඉහළ ආර්ථික ප්‍රතිලාභයක් වගේම ජාතික ආර්ථිකයට එය ධනාත්මකව බලපානු ඇතැයි වැවිලි සහ ප්‍රජා යටිතල පහසුකම් අමාත්‍යාංශය සඳහන් කරයි.
