රතු කැකුළු සහල් හිඟය නිමාවට පත් කරමින් බද්දේගම නගරයේ ඇති වෙළඳසල්වලට රතු කැකුළු සහල් ඊයේ (30) උදෑසන සිට ලැබී ඇතැයි එම ප්‍රදේශයේ පාරිභෝගිකයෝ පවසති. පසුගිය දින කිහිපය තුළ රතු කැකුළු සහල්වල හිඟයක් යම්තාක් දුරට තිබුණද මේ වන විට එම හිඟය නිමාවට පත්කරමින් සහල් තොග තම නගරය ආශ්‍රිත වෙළෙඳසල්වලට ලැබී ඇති බව ද ඔවුහු සඳහන් කරති. ඒ අනුව හිඟයකින් තොරව රතු කැකුළු සහල් තම ප්‍රදේශයේ ජනතාවට ලබාදිය හැකි බවත් රතු කැකුළු සහල් කිලෝවක් රුපියල් 220ක මිලට ලබාදිය හැකි බවත් එම වෙළෙඳසල් හිමියෝ පවසති.
සහල් මිල දී ගැනීමට පැමිණී බද්දේගම ප්‍රදේශයේ කේ.බී. සිරියාවති (76) මහත්මිය සහල් ලැබීම සම්බන්ධයෙන් මෙසේ පැවසුවාය. ‘‘ඕනෑම රජයක් පත්වූ විට ජනතාවට නොයෙකුත් ගැටලුවලට මුහුණ දෙන්න සිදු වෙනවා. අපි ඒවට මුහුණ දෙන්න ඉවසගෙන ඉන්න පුරුදු වෙන්න ඕන. තව සතියක් දෙකක් යනකොට මේ සියලු ප්‍රශ්න නිම වෙනවා. දැන් මේ රතු කැකුළු හාල් කිලෝවක් රුපියල් 220යි. හෙට අනිද්දා වෙද්දී මීටත් වඩා සහල් මිල අඩු වේවි. දැන් පෝලිම් නැහැ. ඒ වගේම අනිවාර්යෙන් පොල් අඩු වෙනවා.”
