2023 වසරේ දෙසැම්බර් මස මාතර, වැලිගම ප්‍රදේශයේ හෝටලයකට වෙඩි තැබීමේ සිද්ධියක් සම්බන්ධයෙන් අපරාධ පරීක්ෂණ දෙපාර්තමේන්තුවේ විමර්ශනවලට සහාය වන ලෙස කොළඹ අපරාධ කොට්ඨාසයේ හිටපු වැඩබලන අධ්‍යක්ෂ සහකාර පොලිස් අධිකාරි නෙවිල් ද සිල්වා මහතා ඇතුළු නිලධාරින් කණ්ඩායමකට අභියාචනාධිකරණය ඊයේ (30) දැනුම් දුන්නේය.
එම සිද්ධිය සම්බන්ධයෙන් තමන්ව අපරාධ පරීක්ෂණ දෙපාර්තමේන්තුව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා කොළඹ අපරාධ කොට්ඨාසයේ හිටපු වැඩබලන අධ්‍යක්ෂ නෙවිල් ද සිල්වා මහතා ඇතුළු පොලිස් නිලධාරින් හත්දෙනෙකු ගොනු කළ රිට් පෙත්සමක් කැඳවූ අවස්ථාවේදී මෙම දැනුම් දීම කරන ලදි.
අභියාචනාධිකරණ විනිසුරු මොහොමඩ් ලෆාර් මහතා හමුවේ මෙම පෙත්සම කැඳවන ලදි.
එහිදී පෙත්සම්කරුවන් වෙනුවෙන් පෙනී සිටි ජනාධිපති නීතිඥ එරාජ් ද සිල්වා මහතා කියා සිටියේ, පෙත්සම්කරුවන් සම්බන්ධයෙන් ඉදිරි පියවර නොගන්නා බවට වගඋත්තරකරුවන් මීට පෙර අධිකරණය හමුවේ ප්‍රතිඥාවක් ලබා දී ඇති බවය.
එම ප්‍රතිඥාව තවදුරටත් දීර්ඝ කරන ලෙස ඒ මහතා අධිකරණයෙන් ඉල්ලා සිටියේය.
ඉදිරි විමර්ශන කටයුතු සඳහා සහාය වන ලෙස පෙත්සම්කරුවන්ට නියම කරන ලෙස වගඋත්තරකරුවන් වෙනුවෙන් පෙනී සිටි නියෝජ්‍ය සොලිසිටර් ජනරාල් මහේෂිකා ද සිල්වා මහත්මිය ඉල්ලා සිටියාය.
ඒ අනුව විමර්ශනවලට සහාය වන ලෙස පෙත්සම්කාර පාර්ශ්වයට අධිකරණය දැනුම් දෙන ලදි. අදාළ ප්‍රතිඥාව ලබන මාර්තු මස 21 වැනිදා දක්වා දීර්ඝ කිරීමට ද අභියාචනාධිකරණය නියෝග කළේය.
පෙත්සම මාර්තු මස 21 වැනිදා කැඳවීමට නියම කෙරිණ. මෙම පෙත්සමේ වගඋත්තරකරුවන් ලෙස වැඩබලන පොලිස්පතිවරයා, මහජන ආරක්ෂක ඇමැති ආනන්ද විජේපාල, අපරාධ පරීක්ෂණ දෙපාර්තමේන්තුව භාර නියෝජ්‍ය පොලිස්පති, මහජන ආරක්ෂක අමාත්‍යාංශයේ ලේකම් රවි සෙනවිරත්න, අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ශානි අබේසේකර ඇතුළු පිරිසක් නම් කර සිටිති.
ප්‍රබල මත්ද්‍රව්‍ය ජාවාරම්කරුවකු වන ‘හරක් කටා’ නමැත්තාගේ ගෝලයන් පිරිසක් වැලිගම ප්‍රදේශයේ සැඟව සිටින බවට ලැබුණ තොරතුරකට අනුව විමර්ශන සඳහා 2023 වසරේ දෙසැම්බර් මස 31 වැනිදා එහි ගිය බව පෙත්සමෙහි සඳහන් වේ.
එම අවස්ථාවේදී මෙම සිද්ධිය හටගත් බව පෙන්වා දෙන පෙත්සම්කරුවන් ඊට අදාළ විමර්ශන මේ වන විට සිදු කරන බව සඳහන් වේ.
මෙම සිද්ධිය සම්බන්ධයෙන් වගඋත්තරකරුවන් තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙසත් පෙත්සම්කරුවෝ අධිකරණයෙන් ඉල්ලා සිටිති.
