පොලිස් මූලස්ථානයේ විදුලි සෝපාන ක්‍රියාකරුවකුට විදුලි සෝපානය අසල දී සාපරාධී බලහත්කාරකම් හා සාපරාධී බිය ගැන්වීම් සිදු කිරීමේ චෝදනාවලට අදාළව හිටපු පොලිස්පති පූජිත් ජයසුන්දර මහතාට එරෙහිව පවරා ඇති නඩුවේ තීන්දුව ලබන පෙබරවාරි මස 19 වැනිදා තෙක් කල්තබන බව කොටුව මහේස්ත්‍රාත් නිලුපුලී ලංකාපුර මෙණෙවිය ඊයේ (30) නියෝග කළාය.
සිද්ධිය සම්බන්ධයෙන් නඩුව කැඳවූ අවස්ථාවේ දී තීන්දුව සඳහා නඩු ගොනුව පූර්වගාමී මහේස්ත්‍රාත්වරිය වෙත යොමු කර ඇතැයි මහේස්ත්‍රාත්වරිය දැනුම් දුන්නාය.
සිද්ධිය සම්බන්ධයෙන් සාක්ෂි කැඳවීම අවසන් කර ඇති අතර, එහි සමස්තයක් ඇති බවට දෙපාර්ශ්වය විසින්ම අධිකරණයට දැනුම් දී ඒ බව වාර්තා කර ඇත.
නඩුව කැඳවූ අවස්ථාවේදී හිටපු පොලිස්පති පූජිත් ජයසුන්දර මහතා විවෘත අධිකරණයේ පෙනී සිටියේය.
ඉකුත් 2017 වසරේ අප්‍රේල් මස 11 වැනිදා අපරාධ පරීක්ෂණ දෙපාර්තමේන්තුවේ සෝපාන අංක එක ක්‍රියාකරුව සිටි රාගම පදිංචි ඒ. එච්. සමරකෝන් බණ්ඩා නිලධාරියාට පහර දීමට තැත් කරමින් පරුෂ වචනයෙන් බැණ තර්ජනය කළ බවට හිටපු පොලිස්පති පූජිත් ජයසුන්දර මහතාට එරෙහිව 2019-06-02 වැනිදා එම නිලධාරියා වැඩබලන පොලිස්පති සී.ඩී. වික්‍රමරත්න මහතා වෙත සිදු කළ පැමිණිල්ලකට අනුව අපරාධ පරීක්ෂණ දෙපාර්තමේන්තුව විමර්ශන සිදු කර ඇත.
