ශ්‍රී ජයවර්ධනපුර සුරාබදු නිලධාරීන් පසුගිය වසරේ සිදු කළ සෝදිසි මෙහෙයුම්වලදී මත්පැන් ජාවාරම්කරුවන් රැසක් අත්අඩංගුවට ගෙන අධිකරණ වෙත ඉදිරිපත් කළේය.
බලපත්‍ර කොන්දේසි කඩකරමින් මත්පැන් අලෙවි කර අත්අඩංගුවට ගත් පුද්ගලයන්ගෙන් මෙසේ රුපියල් හැත්තෑ තුන් ලක්ෂ අසූදාස් හයසිය එකොළහක දඩ ආදායමක් රජයට ලබා දීමට ශ්‍රී ජයවර්ධනපුර සුරාබදු නිලධාරීන් සමත් වී ඇත.
මෙම සෝදිසි මෙහෙයුම්වලදී නීති විරෝධී මත්පැන් පෙරන ස්ථාන 12ක්, කසිප්පු ළඟ තබා ගැනීම් 300ක්, රජයේ අරක්කු බලපත්‍ර නොමැතිව අලෙවි කළ ස්ථාන 12ක්, විදේශ මත්පැන් අලෙවි කළ ස්ථාන 76ක්, හෙරොයින් ළඟ තබාගත් 221ක්, ගංජා ළඟ තබාගත් 192ක්, අයිස් ළඟ තබාගත් 43ක්, තීරු බදු නොගෙවූ සිගරැට් ළඟ තබා ගත් 95ක්, විකිණීම් 15ක්, ගංජා වගාවක් ද කොටුකර ගෙන තිබේ.
අත්අඩංගුවට ගත් සැකකරුවන් 967දෙනකු වටලා අලුත්කඩේ, හෝමාගම, කැස්බෑව, ගංගොඩවිල යන මහේස්‍ත්‍රාත් අධිකරණ වෙත ඉදිරිපත් කොට රුපියල් 59,77500 දඩ මුදලක් අයකරගෙන තිබේ.
හෝටල්, ආපණ ශාලා රටබිමහල් ඇතුළු බලපත්‍ර ස්ථානවල සිදු කළ වැරදි සඳහා කාර්මික අපරාධ වාර්තා 229ක් ඉදිරිපත් කොට අදාළ බලපත්‍රලාභීන්ගේ පෙරවැරදි සලකා බලා සුරාබදු කොමසාරිස් ජෙනරාල්වරයා වෙත ඉදිරිපත් කොට රුපියල් දාහතර ලක්ෂ තුන්දාස් එකසිය එකොළහ සමථ ගාස්තුවක් අයකර ගෙන තිබේ.
නියෝජ්‍ය සුරාබදු කොමසාරිස් ජයන්ත සිල්වා මහතාගේ උපදෙස් මත, සුරාබදු අධිකාරි පී.එන්. හේමන්ත මහතාගේ අධික්ෂණය යටතේ, ශ්‍රී ජයවර්ධනපුර සුරාබදු ස්ථානාධිපති ස්ථානාධිපති නන්දන පෙරේරා මහතාගේ මෙහෙයවීමෙන්, පරීක්ෂකවරුන් වන එම්.එම්.එම්. මහවත්ත, විජේරත්න, අමරතුංග, මහ සැරයන් පෙරේරා, කෝප්‍රල්වරු වන සමරකොන්, හර්ෂ කුමාර, එල්.ආර්. පෙරේරා, පී.සී. මානවඩු, එම්.පී. අරවින්ද, ලලිත් ප්‍රියංකර, රාජපක්ෂ, සූරිආරච්චි, මල්ලව, කාන්තා සුරාබදු නියාමිකා ප්‍රනාන්දු, රියැදුරු රසාන්ත යන නිලධාරීහු මෙම වැටලීම සිදු කළහ.
