යුද හමුදා මූලස්ථාන අසලදී හිටපු යුද හමුදාපති, ජනරාල් සරත් ෆොන්සේකා මහතා මරාගෙන මැරෙන බෝම්බකාරියක යොදවා ඝාතනය කිරීමට අනුබලදීමේ නඩුවේ පැමිණිල්ලේ සාක්ෂි ලැයිස්තුව සතියක් ඇතුළත මෝසමක් මඟින් අධිකරණයට දන්වන ලෙස කොළඹ මහාධිකරණය ඊයේ (29) නීතිපති දෙපාර්තමේන්තුවට නියෝග කරන ලදි.
කොළඹ මහාධිකරණ විනිසුරු නවරත්න මාරසිංහ මහතා හමුවේ නඩුව විභාගයට ගත් අවස්ථාවේ නඩුවේ ප්‍රධාන විත්තිකරු වන සෙල්වරාසා කිරුබාකරන් හෙවත් මොරිස් ශම්මුගලිංගම් සූරියකුමාර් යන අය බන්ධනාගාරය අධිකරණයට ඉදිරිපත් කළේය. එහිදී මරාගෙන මැරෙන බෝම්බකාරිය හඳුනා ගැනීම කළ රඹුක්කන පදිංචි ආර්.පී. ස්වර්ණලතා යන අය ජ්‍යෙෂ්ඨ නියෝජ්‍ය සොලිසිටර් ජනරාල් ලක්මාලි කරුණානායක මහත්මියගේ මෙහෙයවීම යටතේ සාක්ෂි දෙන ලදි. අදාළ බෝම්බකාරිය ප්‍රහාරය සිදුවීමට සති දෙකකට පමණ පෙර ප්‍රධාන විත්තිකරුගේ නිවෙසේ පදිංචිව සිටි බව ඇය කියා සිටියාය.
ප්‍රහාරය සිදු වූ දිනට පසුදින පුවත්පතක පළවූ ඡායාරූපය අසල නිවෙසේ තාවකාලිකව පදිංචිව සිටි කාන්තාවගේ බවට හඳුනාගත් පසු ඒ පිළිබඳ ඔවුන්ගෙන් විමසූ විට ‘ආ’ යනුවෙන් සිහින් කෙඳිරිලි හඬක් නිකුත් කර කිසිවක් නොපවසා සිටි බව කියා සිටියේය. අපරාධ පරීක්ෂණ දෙපාර්තමේන්තුව පසුව ඡායාරූපයක් පෙන්වා විමසීමක් කළ බවත් ඉන් පසුව මෘත ශරීරාගාරයේ දී කඳෙන් වෙන්වුණු බෝම්බකාරිය විත්තිකරුගේ නිවෙසේ පදිංචිව සිටි තැනැත්තිය ලෙස හඳුනාගත් බව කියා සිටියේය.
විත්තිය ඇගේ සාක්ෂිය හරස් ප්‍රශ්න විමසීමට භාජනය නොකළාය. පාදයේ ශල්‍යකර්මයකට ලක්ව සිටියදී දුරබැහැර ප්‍රදේශයක සිට සාක්ෂි විභාගයට සහභාගීවීම සම්බන්ධයෙන් පැමිණිල්ල සාක්ෂිකාරිය අධිකරණ කටයුතුවලට සහායවීම සම්බන්ධයෙන් අගය කළාය. 2006 ජනවාරි 25 වැනිදා යුද හමුදා මූලස්ථානයේ පිවිසුම් දොරටුව අසලදී එවකට යුද හමුදාපතිවරයා ලෙස කටයුතු කළ සරත් ෆොන්සේකා මහතා ඝාතනය කිරීමේ අරමුණින් එල්ටීටීඊ බෝම්බකාරියක වන දුර්ගා නමැත්තිය සිදුකළ මරාගෙන මැරෙන බෝම්බ ප්‍රහාරයට ආධාර අනුබල දීම ඇතුළු චෝදනා 230ක් යටතේ හිටපු එල්ටීටීඊ සාමාජිකයන් යැයි කියන විත්තිකරුවන් තිදෙනෙකුට එරෙහිව නීතිපතිවරයා විසින් නඩු පවරන ලදි. සෙල්වරාසා කිරුබාකරන් හෙවත් මොරිස් ශම්මුගලිංගම් සූරියකුමාර් හා තම්බයියා ප්‍රකාශ් හෙවත් ධනුෂ් නමැති එම විත්තිකරුවන් ඊයේ දින අධිකරණය හමුවට ඉදිරිපත් කර තිබුණි.
එකී මරාගෙන මැරෙන බෝම්බ ප්‍රහාරයෙන් සරත් ෆොන්සේකා මහතා බරපතළ තුවාල ලබා තිබූ අතර ඔහුගේ ආරක්ෂාවට යොදවා සිටි යුද හමුදා සැරයන්වරයකු, කෝප්‍රල්වරුන් තිදෙනෙකු ඇතුළු යුද හමුදා සෙබළුන් කිහිප දෙනෙකු මියගොස් තවත් භට පිරිසක් තුවාල ලබා තිබුණි.
ජ්‍යෙෂ්ඨ නියෝජ්‍ය සොලිසිටර් ජනරාල් ලක්මාලි කරුණානායක මහත්මිය පැමිණිල්ල මෙහෙයවූවාය. විත්තිය වෙනුවෙන් නීතිඥ සුරංග බණ්ඩාර, දේවේන්ද්‍ර, ආනෝල්ඩ් ප්‍රියන්තන් යන මහත්වරු සමඟ නීතිඥ මඬුල්ලක් පෙනී සිටියහ.
