ඊශ්‍රායලය සහ හමාස් සංවිධානය අතර සටන් විරාම ගිවිසුමට අනුව තුන්වැනි අදියර යටතේ තවත් ප්‍රාණ ඇපකරුවන් 8 දෙනකු ඊයේ නිදහස ලැබූ බව විදෙස් මාධ්‍ය වාර්තා කරයි. ඊශ්‍රායල ජාතිකයන් තිදෙනකු සහ තායිලන්ත ජාතිකයන් පස්දෙනකු ඒ අතර සිටින බව ද විදෙස් මාධ්‍ය වැඩිදුරටත් වාර්තා කරයි. ඊට පිළිතුරු ලෙස ඊශ්‍රායල රජය පලස්තීන යුද සිරකරුවන් 110 දෙනකු නිදහස් කිරීමට නියමිතව තිබූ බව ද වාර්තා වේ.
නිදහස ලැබූ ඊශ්‍රායල ජාතිකයන් අතර හමුදා සෙබළියක් ඇතුළු කාන්තාවන් දෙදෙනකු සහ 80 හැවිරිදි පිරිමි පුද්ගලයකු සිටින බවත්, තායිලන්ත ප්‍රාණ ඇපකරුවන් සියලුදෙනා පිරිමි පුද්ගලයන් බවත් ජාත්‍යන්තර රතු කුරුස සංවිධානය නිවේදනය කර තිබේ. කෙසේ වුවද ගාසා තීරයේ ඛාන් යූනිස් නගරයේ විශාල ජනතාවක් රැස්ව සිටීමෙන් ප්‍රාණ ඇපකරුවන් නිදහස් කිරීමේදී අපහසුතාවට පත්වූ බව රතු කුරුස සංවිධානයේ නියෝජිතයන් ප්‍රකාශ කර තිබේ.
