මගීන් 60 දෙනෙක් සහ කාර්ය මණ්ඩලයේ සිවුදෙනෙක් රැගත් අමෙරිකානු ගුවන් සේවයට අයත් දේශීය ගුවන් යානයක් සහ යුද හමුදා හෙලිකොප්ටරයක් පෙරේදා රාත්‍රී වොෂින්ටන් නුවර උඩුගුවනේදී එකට ගැටීමෙන් යානා දෙකම ගිනි ගෙන පොටෝමැක් ගංගාවට කඩා වැටී ඇතැයි විදෙස් මාධ්‍ය වාර්තා කරයි. පොලිස් කිමිදුම්කරුවන් ඇතුළු 300කට අධික කණ්ඩායමක් එක්වී ගංගාවට කඩා වැටුණු යානා දෙකෙහිම පුද්ගලයන් සෙවීමේ මෙහෙයුමක් ආරම්භ කර ඇති අතර, ඊයේ පස්වරුව වනවිට මළ සිරුරු 30ක් ගොඩගත් බව මෙහෙයුම් නිලධාරීන් තහවුරු කර ඇතැයිද වාර්තා වේ. කෙසේ වුවද ගුවන්යානයේ සිටි 64 දෙනා සහ හෙලිකොප්ටරයේ සිටි තිදෙනා ඇතුළුව 67 දෙනාම මිය යන්නට ඇතැයි විශ්වාස කරන බව බලධාරීහු කියති.
මේ දිනවල පවතින දැඩි සීත කාලගුණය හමුවේ මළ සිරුරු සෙවීමේ මෙහෙයුම් අඩාළ වී ඇති අතර, ජීවතුන් අතර සිටින පුද්ගලයන් බේරා ගැනීමට කිමිදුම්කරුවන් දැඩි උත්සාහයක නිරතව සිටින බවද වාර්තා වේ.
කැන්සාස් ප්‍රාන්තයේ විචිටා නුවර සිට වොෂින්ටන් නුවර රොනල්ඩ් රේගන් දේශීය ගුවන්තොටුපොළ දක්වා පියාසර කරමින් තිබූ එම ගුවන් යානය අනතුරට ලක්වී ඇත්තේ ගොඩ බැසීමට මොහොතකට පෙර බව ද වාර්තා වේ. ගුවන් යානයේ ගැටුණු අමෙරිකානු යුද හමුදාවට අයත් බ්ලැක් හෝක් වර්ගයේ හෙලිකොප්ටරයේ හමුදා සෙබළුන් තිදෙනකු සිටි බව එරට මාධ්‍ය සඳහන් කරයි. වසර 15කට පසු අමෙරිකාවේ සිදුවූ එම ගුවන් අනතුරට හේතුව මෙතෙක් අනාවරණය වී නැති අතර, අයහපත් කාලගුණය පිළිබඳ වැඩි අවධානයක් යොමු කරමින් පරීක්ෂණ කටයුතු ආරම්භ කර තිබේ. අනතුරත් සමඟ තාවකාලිකව වසා දැමූ රොනල්ඩ් රේගන් දේශීය ගුවන්තොටුපොළේ මෙහෙයුම් පැය කිහිපයකට පසු යළි ආරම්භ කර ඇතැයි ද වාර්තා වේ.
අනතුරට පත් වූ ගුවන් යානයේ මගීන් අතර රුසියානු හිම ක්‍රීඩා ශූරියෝ දෙදෙනෙක්
අමෙරිකානු ක්‍රීඩකයොත් ඒ අතර
වොෂින්ටන් නුවරදී අනතුරට ලක්වූ ගුවන් යානයේ මගීන් අතර රුසියාවේ හිටපු හිම ක්‍රීඩා ලෝක ශූරියන් දෙදෙනකු සහ අමෙරිකාවේ හිම ක්‍රීඩා ශූරයන් කිහිපදෙනකු සහ පුහුණුකරුවන් පිරිසක් ද සිටි බව විදෙස් මාධ්‍ය සඳහන් කරයි. ඔවුන් කැන්සාස් ප්‍රාන්තයේ පැවැති පුහුණු කඳවුරකට සහභාගි වී ආපසු වොෂින්ටනය බලා පැමිණෙමින් සිටි බව අමෙරිකාවේ හිම ක්‍රීඩා සංගමය තහවුරු කර ඇතැයි ද විදෙස් මාධ්‍ය වැඩිදුරටත් සඳහන් කරයි.
එම ගුවන් අනතුරින් මියගිය ගණන මෙතෙක් තහවුරු වී නැති බැවින් හිම ක්‍රීඩා පුහුණුවට ගිය ක්‍රීඩක ක්‍රීඩිකාවන්ගේ තත්ත්වය පිළිබඳ පූර්ව නිගමනයකට පැමිණීමට නොහැකි බව අමෙරිකානු හිම ක්‍රීඩා සංගමය ප්‍රකාශ කර තිබේ.
