දරුවකුගේ අස්වීමේ සහතිකයක් ලබා ගැනීමට පාසලකට පැමිණ කලහකාරී ලෙස හැසිරුණු යුවළක් අත්අඩංගුවට ගත් බව අගලවත්ත පොලීසිය පවසයි.
09 වසර පන්තියේ ඉගෙනුම ලබන දරුවකුගේ අස්වීමේ සහතිකය ලබා ගැනීමට එම දරුවාගේ මවුපියන් ඉකුත් 27 වැනිදා පාසලට පැමිණ ඇති අතර පුස්තකාලයෙන් ලබාගත් පොත්පත් ඇත්නම් ඒවා බාර දෙන ලෙසත්, පහසුකම් ගාස්තු ඇතුළු අදාළ ගෙවීම් නිසිලෙස සිදු කරන ලෙසත් එම ලිපි ලේඛන නිකුත් කරන්නේ බ්‍රහස්පතින්දා දිනයට බැවින් එදිනට පැමිණෙන ලෙසත් ඔවුන්ට දන්වා තිබේ.
මෙම සිද්ධිය දැනගත් පසුව ඔවුන්ට හිතවත් අඹුසැමි යුවළක් පාසලට පැමිණ අදම අස්වීම ලබාදෙන ලෙස ඉල්ලා විදුහල්පතිවරයා ඇතුළු අදාළ නිලධාරීන්ට බැණ වැදී කලහකාරී ලෙස හැසිරී තිබේ. ඒ පිළිබඳ පොලීසියට ද පැමිණිලි කර ඇත.
මීට අමතරව පාසල අවසන්ව නිවෙස් බලායන ගුරුවරුන්ට බැණ වදිමින්, පසුපසින් ගමන් කරමින් වීඩියෝගත කර සමාජ මාධ්‍යවල පළකරන බව පවසා ඇති බව ද පොලීසිය පවසයි.
අත්අඩංගුවට ගත් සැකකාරිය හා සැකකරු අධිකරණයට ඉදිරිපත් කිරීමට නියමිත බව පොලීසිය පවසයි.
