ගුරු මාරු මණ්ඩල මඟින් විධිමත් ලෙස ලබාදුන් ගුරුමාරු නිර්දේශවලට අනුකූලව කටයුතු කරන ලෙස අධ්‍යාපන ලේකම්වරයා ලිඛිතව දැනුම් දී තිබිය දී ජාතික පාසල් ගණනාවක විදුහල්පතිවරු ඊට අනුගතව කටයුතු නොකිරීම නිසා පාසල් රැසක් බරපතළ ගැටලු නිර්මාණය වී ඇතැයි ලංකා ගුරු සංගමයේ ලේකම් ජෝෂප් ස්ටාලින් මහතා පවසයි. ඇතැම් ජාතික පාසල්වල මාරුවීම් ලද ගුරුවරු විදුහල්පතිවරු විසින් නිදහස් නොකිරීම නිසා මාරුවීම් ලැබ එම පාසල්වලට පැමිණෙන ගුරුවරුන්ට වැඩභාර ගැනීමේ හැකියාවක් නැති තත්ත්වයක් මතුව ඇතැයි ද ඒ මහතා කීය.
අදාළ තත්ත්වය හේතුවෙන් නව පාසල් වාරය ආරම්භ වීමත් සමඟ සිසු දරුවන්ගේ අධ්‍යාපන කටයුතුවලට දැඩි බලපෑමක් මතුව තිබෙන බවත් අධ්‍යාපන අමාත්‍යාංශ ලේකම්වරයාගේ දැනුම් දීම් නොතකමින් වැඩ කරන විදුහල්පතිවරු සම්බන්ධයෙන් විධිමත් ක්‍රියාමාර්ග ගතයුතුව තිබෙන බවත් ස්ටාලින් මහතා පැවැසීය. වසර 10කට වඩා වැඩි කාලයක් ඇතැම් ජාතික පාසල්වල සේවය කළ ගුරුවරු විදුහල්පතිවරු සමඟ එක්ව විවිධ අක්‍රමිකතා සිදු කරන බවත් මේ නිසා විදුහල්පතිවරු ඔවුන් පාසල්වලින් නිදහස් කිරීමට අකමැත්තක් දක්වන බවත් ඒ මහතා ප්‍රකාශ කළේය.
ජාතික පාසල්වල ඉගැන්වීම් කටයුතු සිදු කරන ගුරුවරු 9000ක පමණ පිරිසක් මෙවර මාරුවීම් අපේක්ෂාවෙන් ගුරුමාරු මණ්ඩල වෙත ලිපි ඉදිරිපත් කර තිබූ බව ද හෙතෙම කීය.
