බහලුම් නිෂ්කාශන ප්‍රමාදයට හේතුව වාප්පු ලිපිකරුවන්ගේ පැමිණීමේ ප්‍රමාදය බව සඳහන් කරමින් බහලුම් පරීක්ෂාව සඳහා අය කරන මුදල හිතුමතේ ඉහළ දැමීමට නිෂ්කාශන අංගණ කටයුතු කර ඇතැයි ලංකා වාප්පු සේවා සංගමය චෝදනා කරයි.
බහලුම් සඳහා පවතින තදබදය අවම කිරීම හා වඩාත් කාර්යක්ෂම සේවාවක් සඳහා යැයි කියමින් මෙලෙස මුදල් අය කිරීමට තීරණය කර ඇත්තේ කිසිදු නියාමනයකින් තොරව යැයිද එම සංගමයේ සභාපති රංජිත් ලියනාරච්චි මහතා පවසයි.
ආර්. සී.ටී, ග්‍රේ ලයින් 1, ග්‍රේ ලයින් 2 ලෙස පෞද්ගලික අංශය සතු ප්‍රධාන බහලුම් නිෂ්කාශන අංගණ තුනක් පවතින අතර බහලුම් රැගත් ලොරි රථ වරායෙන් පිටත පිහිටි මෙම අංගණවලදී පරීක්ෂාවට ලක්කෙරෙයි. ආනයනික භාණ්ඩ බහලුමට අදාළ ලිපි ලේඛන කටයුතු අවසන් වීමෙන් පසුව මෙම අංගණයක් වෙත යොමු කෙරෙන බහලුම තමන්ට නියමිත පරීක්ෂණ වාරය පැමිණෙන තෙක් රැඳී සිටියි. මෙම අංගණයක බහලුමක් පරීක්ෂා කෙරෙන ආකාරය අනුව විවිධ ගණන්වලින් මුදල් අයකෙරෙන අතර සාමාන්‍යයෙන් රුපියල් 10000ක මුදලක් ඊට ගෙවිය යුතුව ඇත. සමහර අවස්ථාවල එම මුදල රුපියල් 30000ක් හෝ ඊට වඩා වැඩිවන අවස්ථාද ඇත.
එසේ තිබියදීත්, නිෂ්කාශන ප්‍රමාදයට හේතුව වාප්පු ලිපිකරුවන්ගේ පැමිණීමේ ප්‍රමාදය යැයි කියමින් උදේ 10 පසු වූ විට ප්‍රමාද ගාස්තු අය කිරීමේ ක්‍රමවේදයක් කිසිදු නියාමනයකින් තොරව ආරම්භ කර ඇතැයිද ඒ මහතා පවසයි.
ඒ අනුව උදේ 10 පසුවුවහොත් රුපියල් 6000ක්, දවල් 3න් පසුව රුපියල් 10000ක් වශයෙන් මෙම ප්‍රමාද ගාස්තු අය කෙරෙයි. මේ සම්බන්ධයෙන් වාප්පු ලිපිකරුවන්ගේ දැනගැනීම සඳහා දැන්වීම් පුවරුද ප්‍රදර්ශනය කර ඇත. මෙම ප්‍රමාදයට හේතුව සැබැවින්ම වාප්පු ලිපිකරුවන් නම් මෙලෙස අය කෙරෙන ප්‍රමාද ගාස්තුව නියාමනයක් ඔස්සේ රජයට ලැබෙන ආදායමකට පරිවර්තනය කරගන්නේ නම් එහි තරමක හෝ සාධාරණයක් ඇතැයිද පෙන්වා දෙන ඒ මහතා සඳහන් කරන්නේ මෙය අංගණ හිමිකරුවන්ගේ ආදායම වැඩිකර ගැනීමට ගත් උත්සාහයක් බවයි.
මේ අයුරින් අය කෙරෙන සියලු මුදල් අවසානයේ බඩු මිල වැඩිවීම හරහා පාරිභෝගික ජනයා මත වැටෙන හෙයින් රජයේ බලධාරීන්ගේ අවධානය කඩිනමින් යොමුවිය යුතුව ඇතැයි ද ඒ මහතා වැඩිදුරටත් සඳහන් කළේය.
