ශ්‍රේෂ්ඨාධිකරණය හමුවේ අභියෝගයට ලක් කර ඇති පළාත් පාලන ආයතන ඡන්ද විමසීම් (විශේෂ විධිවිධාන) පනත් කෙටුම්පත සම්බන්ධයෙන් ශ්‍රේෂ්ඨාධිකරණ තීරණය පෙබරවාරි 5 වැනිදාට පෙර කථානායකවරයා වෙත ලැබුණොත් එම පනත් කෙටුම්පත පිළිබඳ දෙවන වර කියවීමේ විවාදයද පෙබරවාරි 6 වැනිදා පැවැත්වීමට පාර්ලිමේන්තු කටයුතු පිළිබඳ කාරක සභාව තීරණය කර ඇත.
ඒ අනුව අදාළ තීන්දුව ලැබුණොත් විවාදය 6 වැනිදා පෙරවරු 11.30 සිට පස්වරු 5.00 දක්වා පැවැත්වීමට නියමිතය. පාර්ලිමේන්තු කටයුතු පිළිබඳ කාරක සභාව, කථානායක වෛද්‍ය ජගත් වික්‍රමරත්න මහතාගේ ප්‍රධානත්වයෙන් පසුගියදා රැස්වූ අතර, එහිදී ලබන සතියේ පාර්ලිමේන්තු කටයුතු පිළිබඳව අවධානය යොමු කර ඇත.
ඒ අනුව පාර්ලිමේන්තුව ලබන 05, 06, 07 දිනවලදී රැස්වීමටද තීරණය කර ඇත.
ඒ අනුව 5 වැනිදා විදේශ විනිමය පනත යටතේ නියෝගයක් සහ ආනයන හා අපනයන (පාලන) පනත යටතේ රෙගුලාසි දෙකක් විවාදයට ගැනීමට නියමිත වේ. පස්වරු 3.30 සිට පස්වරු 5.30 කාලය තුළ ආණ්ඩු පාර්ශ්වය විසින් ගෙන එනු ලබන සභාව කල්තැබීමේ විවාදය පැවැත්වීමට නියමිතය. 06 වැනිදා බුද්ධිමය දේපළ පනත යටතේ රෙගුලාසි විවාදයට ගැනීමට නියමිත වේ. පළාත් පාලන ආයතන ඡන්ද විමසීම් (විශේෂ විධිවිධාන) පනත් කෙටුම්පත සම්බන්ධයෙන් ශ්‍රේෂ්ඨාධිකරණ තීරණය පෙබරවාරි 5 වැනිදාට පෙර කථානායකවරයා වෙත ලැබුණහොත් එම පනත් කෙටුම්පත පිළිබඳ දෙවන වර කියවීමේ විවාදයද පෙබරවාරි 6 වැනිදා පැවැත්වීමට පාර්ලිමේන්තු කටයුතු පිළිබඳ කාරක සභාව තීරණය කර ඇත.
පෙබරවාරි 07 වැනිදා දවස පෞද්ගලික මන්ත්‍රී යෝජනා 06ක් විවාදයට ගැනීමට නියමිතව ඇත. ඒ යටතේ හේෂා විතානගේ මහතා විසින් ඉදිරිපත් කළ වතු ආශ්‍රිතව පවතින මාර්ග රජයට පවරා ගැනීම පිළිබඳ පෞද්ගලික මන්ත්‍රී යෝජනාව, කිංස් නෙල්සන් මහතා විසින් ඉදිරිපත් කළ සමුපකාර සඳහා භාණ්ඩ මිලදී ගැනීමේ ක්‍රියාවලියට නිසි ප්‍රසම්පාදන වැඩසටහනක් සකස් කිරීම පිළිබඳ පෞද්ගලික මන්ත්‍රී යෝජනාව,
රෝහණ බණ්ඩාර මහතා විසින් ඉදිරිපත් කළ රජය සතුව සහල් සංචිතයක් පවත්වාගෙන යාම සඳහා වැඩපිළිවෙළක් සකස් කිරීම පිළිබඳ පෞද්ගලික මන්ත්‍රී යෝජනාව, චමින්ද විජේසිරි මහතා විසින් ඉදිරිපත් කළ කම්කරු සුබසාධන නිලධාරින් පත් කිරීම සඳහා නිසි ක්‍රමවේදයක් සකස් කිරීම පිළිබඳ පෞද්ගලික මන්ත්‍රී යෝජනාව, රවි කරුණානායක මහතා විසින් ඉදිරිපත් කළ ශ්‍රී ලංකා පාර්ලිමේන්තු මන්ත්‍රීවරුන්ගේ විශ්‍රාම වැටුප් යෝජනා ක්‍රමය අහෝසි කිරීම පිළිබඳ පෞද්ගලික මන්ත්‍රී යෝජනාව සහ රවුෆ් හකීම් මහතා විසින් ඉදිරිපත් කළ කොවිඩ් – 19 වසංගතයෙන් මිය ගිය පුද්ගලයින්ගේ සිරුරු මිහිදන් කිරීමෙන් වැළකී ආදාහනය කිරීම සම්බන්ධයෙන් විමර්ශනය කොට සුදුසු නිර්දේශ ඉදිරිපත් කිරීම සඳහා පාර්ලිමේන්තු විශේෂ කාරක සභාවක් පත් කිරීම පිළිබඳ පෞද්ගලික මන්ත්‍රී යෝජනාව විවාදයට ගැනීමට නියමිත වේ.
