රක්ෂිත බන්ධනාගාරගත කර සිටින ආගමන විගමන පාලක හර්ෂ ඉලුක්පිටිය මහතාට ඇප ලබා දෙන්නේද නැද්ද යන්න සම්බන්ධයෙන් වන නියෝගය ප්‍රකාශ කිරීම දින නියමයක් නොමැතිව කල් තැබීමට ශ්‍රේෂ්ඨාධිකරණය ඊයේ (29) තීරණය කළේය.
ගුවන්තොටුපොළ ආශ්‍රිතව විද්‍යුත් විසා නිකුත් කිරීමේ ක්‍රමවේදය පෞද්ගලික සමාගම් දෙකකට පැවරීම සම්බන්ධයෙන් අධිකරණය විසින් ලබාදුන් තීන්දුවට අනුව කටයුතු නොකිරීම මඟින් අධිකරණයට අපහාස කිරීමේ චෝදනාව මත හර්ෂ ඉලුක්පිටිය මහතා අත්අඩංගුවට ගනු ලැබ සිටී. ඔහුට ඇප ලබා දෙන ලෙස කළ ඉල්ලීමක් සම්බන්ධයෙන් ඉදිරිපත් වූ කරුණු සලකා බැලීමෙන් අනතුරුව මේ බව තීරණය කරන ලදි.
ප්‍රීති පද්මන් සූරසේන, ගාමිණී අමරසේකර සහ අචල වෙංගප්පුලි යන මහත්වරුන්ගෙන් සමන්විත ශ්‍රේෂ්ඨාධිකරණ විනිසුරු මඬුල්ලක් හමුවේ මෙම ඇප ඉල්ලීම සිදු කරන ලදි.
ඊට අදාළ මූලික අයිතිවාසිකම් පෙත්සම්වල පළමු වන වගඋත්තරකාර ආගමන විගමන පාලකවරයා වෙනුවෙන් අධිකරණය හමුවේ පෙනී සිටි ජනාධිපති නීතිඥ සාලිය පීරිස් මහතා සඳහන් කළේ ජ්‍යෙෂ්ඨ පරිපාලන නිලධාරියකු වන සිය සේවාදායකයා මාස හතරක කාලයක් රිමාන්ඩ් භාරයේ පසු වන බවය.
ඔහුට දීර්ඝ කාලයක් රක්ෂිත බන්ධනාගාරගතව සිටීමට සිදු වීම නිසා දරුවන් ඇතුළු පවුලේ සියලු දෙනා විශාල මානසික පීඩාවකට ලක්ව සිටින බවද ජනාධිපති නීතිඥවරයා සඳහන් කළේය.
මෙහිදී නීතිපතිවරයා වෙනුවෙන් පෙනී සිට අතිරේක සොලිසිටර් ජනරාල් විවේකා සිරිවර්ධන මහත්මිය සඳහන් කළේ, වගඋත්තරකාර ආගමන විගමන පාලකවරයාට ඇප ලබාදීම සම්බන්ධයෙන් තමන් විරුද්ධ නොවන බවය.
