මත්ද්‍රව්‍ය ජාවාරම් කිරීමේ චෝදනාවෙන් විත්තිකාර ධීවරයන් පස් දෙනකු නිදොස් කොට නිදහස් කිරීමට කොළඹ ත්‍රිපුද්ගල මහාධිකරණ විනිසුරු මඬුල්ලක් විසින් දෙන ලද තීන්දුවක් බලරහිත කරන ලෙස ඉල්ලා නීතිපතිවරයා විසින් ඉදිරිපත් කරන ලද අභියාචන පෙත්සම විභාගයට ගැනීම සඳහා ශ්‍රේෂ්ඨාධිකරණය ඊයේ (29) දින නියම කළේය.
ඒ අනුව එම අභියාචන පෙත්සම ලබන අප්‍රේල් මස 02 , 03 සහ 04 යන දිනවල විභාගයට ගැනීමට නියෝග කෙරිණි. හෙරොයින් කිලෝ 196.8ක් සමඟ 2019 වසරේ දී උතුරු මුහුදේදී මෙම ධීවරයන් අත්අඩංගුවට ගැනීමෙන් අනතුරුව මත්ද්‍රව්‍ය ප්‍රවාහනය කිරීම හා ජාවාරම් කිරීමේ චෝදනා යටතේ මෙම නඩුව පවරා තිබුණි
එස්. තුරෙයිරාජා, යසන්ත කෝදාගොඩ, ශිරාන් ගුණරත්න, අචල වෙංගප්පුලි සහ ප්‍රියන්ත ප්‍රනාන්දු යන මහත්වරුන්ගෙන් සමන්විත පංච පුද්ගල ශ්‍රේෂ්ඨාධිකරණ විනිසුරු මඬුල්ලක් හමුවේ මෙම පෙත්සම කැඳවන ලදි.
එම අවස්ථාවේදී ඉදිරිපත් වූ කරුණු සලකා බැලූ විනිසුරු මඬුල්ල එම අභියාචන පෙත්සම විභාගයට ගැනීමට දින නියම කළේය.
බහුදින ධීවර යාත්‍රාවකින් එම මත්කුඩු තොගය රැගෙන එමින් සිටියදී පොලිස් මත්ද්‍රව්‍ය නාශක කාර්යාංශයට සහ නාවික හමුදාවට ලැබුණු බුද්ධි තොරතුරු මත සැකකරුවන් පස් දෙනකු ඉකුත් 2019.04.21දින උතුරු මුහුදු සීමාවේදී අත්අඩංගුවට ගනු ලැබුණි.
අනතුරුව හෙරොයින් කිලෝ 196.986ක් සන්තකයේ තබා ගැනීම, ගෙන්වීම, ජාවාරම් කිරීම යන අධි චෝදනා යටතේ මෙම විත්තිකරුවන් පස් දෙනාට නීතිපතිවරයා විසින් 2022 ජූනි මස 24 වැනිදා කොළඹ මහාධිකරණය හමුවේ නඩු පවරන ලදි.
එම නඩුව ආදිත්‍ය පටබැඳිගේ, මංජුල තිලකරත්න, සහ මහේෂ් වීරමන් යන ත්‍රිපුද්ගල මහාධිකරණ විනිසුරු මඬුල්ල හමුවේ විභාගයට ගැනුණි.
එම නඩු විභාගය අවසන් කළ ත්‍රිපුද්ගල මහාධිකරණ විනිසුරු මඬුල්ල, එහි තීන්දුව ඉකුත් වසරේ අප්‍රේල් මස 6 වැනිදා ප්‍රකාශයට පත් කරමින් මෙම විත්තිකරුවන් සියලු චෝදනාවලින් නිදොස් කොට නිදහස් කළේය.
නඩු විභාගයේදී ඉදිරිපත් වූ සාක්ෂි පරස්පර බවට එම තීන්දුව මගින් පෙන්වා දී තිබිණි.
එසේම විත්තිකරුවන්ට එරෙහි චෝදනා සාධාරණ සැකයෙන් තොරව ඔප්පු කිරීමට පැමිණිලිකාර පාර්ශ්වය අපොහොසත් වී ඇති බවට එම නඩු තීන්දුවේ සඳහන් විය.
මෙම තීන්දුවට එරෙහිව අභියාචනයක් ගොනු කරමින් නීතිපතිවරයා සඳහන් කරන්නේ අදාළ තීන්දුව ලබා දීමේදී ත්‍රිපුද්ගල විනිසුරු මඬුල්ල විසින් නඩු විභාගයේ දී පැමිණිල්ල විසින් ඉදිරිපත් කළ සාක්ෂි නිසි ලෙස ඇගයීමක් සිදු කර නැති බවය.
මෙම විත්තිකරුවන් පස් දෙනා නිදොස් කොට නිදහස් කරමින් ඉකුත් වසරේ අප්‍රේල් මස 6 වැනිදා ප්‍රකාශ කරන ලද ත්‍රිපුද්ගල මහාධිකරණ විනිසුරු මඬුල්ලේ නඩු තීන්දුව බලරහිත කරන ලෙස මෙම අභියාචන පෙත්සම මගින් ඉල්ලා ඇත. එසේම එම විත්තිකාර වගඋත්තරකරුවන් නැවත රිමාන්ඩ් භාරයට පත් කරන ලෙස ද නීතිපතිවරයා සිය අභියාචන පෙත්සම් මඟින් ඉල්ලා සිටියේය.
එම විත්තිකරුවන් නීතියට අනුව වරදකරුවන් බවට තීරණය කොට ඔවුන්ට අදාළ දඬුවම් නියම කරන ලෙස ද මෙම පෙත්සම මගින් ඉල්ලා ඇත .
මෙම සහන හෝ විකල්ප ලෙස අදාළ විත්තිකරුවන්ට එරෙහිව නැවත නඩු විභාගයක් පවත්වන ලෙස නියෝගයක් කරන ලෙස ද නීතිපතිවරයා සිය පෙත්සම මගින් ශ්‍රේෂ්ඨාධිකරණයෙන් ඉල්ලා ඇත. කොළඹ මහාධිකරණ නඩුවේ විත්තිකරුවන් වූ ජයකොඩි ආරච්චිගේ අනුර චමින්ද අප්පුහාමි, තවරාසා සුදාකරන්, අග්ලෙස පිල්ලේ තවරාසා, යක්දෙහි ආරච්චිගේ ලසන්ත ප්‍රියලාල් අප්පුහාමි හෙවත් යක්ඛ ආරච්චිගේ ලසන්ත ප්‍රියලාල්, කන්දයියා චන්ද්‍රකුමාර යන අය මෙහි වගඋත්තරකරුවෝ වෙති.
