හෙරොයින් ග්‍රෑම් තුනකට ආසන්න ප්‍රමාණයක් සිය සන්තකයේ තබාගත් බව කියන රොබා නමැති සැකකරුවකු පෙබරවාරි මස 4 දින දක්වා කොළඹ අපරාධ කොට්ඨාසයේ රඳවා තබාගෙන ප්‍රශ්න කිරීමට කොළඹ අතිරේක මහේස්ත්‍රාත් තරංගා මහවත්ත මහත්මිය ඊයේ (29) එම අපරාධ කොට්ඨාසයට අවසර ලබා දුන්නාය.
උඩුමුල්ල ප්‍රදේශයේ පදිංචිකරුවෙකු වන දොන් අමිල කුමාර නොහොත් රොබා නමැත්තකු එසේ රඳවා තබා ගැනීමට නියම විය.
කොළඹ අපරාධ කොට්ඨාසය වෙත ලද තොරතුරකට අනුව සිදු කළ විමර්ශනයකදී සැකකාර පුද්ගලයා හෙරොයින් ග්‍රෑම් 2.218 සමඟ මුල්ලේරියාව ප්‍රදේශයේදී අත්අඩංගුවට ගත් බවද විමර්ශන නිලධාරින් අධිකරණයට දැන්වීය.
සිද්ධියට අදාළව සැකකාර පුද්ගලයාගෙන් ලබාගන්නා තොරතුරු අනුව තවදුරටත් විමර්ශන සිදු කරන බවත් එහි ප්‍රගතිය ඉදිරි නඩු වාරයේදී අධිකරණයට ඉදිරිපත් කිරීමට පියවර ගන්නා බවද විමර්ශන නිලධාරින් සිද්ධිය සම්බන්ධයෙන් වැඩිදුරටත් කරුණු දක්වමින් අධිකරණය හමුවේ පැවසූහ.
