යාපනයේ කරෙයිනගර්, කැෂුරිනා මුහුදේ දිය නාමින් සිටි පුද්ගලයින් හය දෙනෙකු විෂක් ශරීරගත වීම හේතුවෙන් පෙරේදා (27) කරෙයිනගර් රෝහලට ඇතුළත් කොට තිබේ.
කරෙයිනගර් රෝහලේ ප්‍රධාන වෛද්‍ය නිලධාරිවරයා ප්‍රකාශ කළේ ඔවුන්ගේ සිරුරුවලට විෂ සහිත යමක් ඇතුළත් වී ඇතත් ඒ කුමන දෙයක්ද යන්න තවමත් ප්‍රකාශ කළ නොහැකි බවයි.
එම රෝගීන්ගෙන් ලබා ගත් රුධිර සාම්පල වැඩිදුර පරීක්ෂණ කටයුතු සඳහා යාපනය ශික්ෂණ රෝහල වෙත යවා තිබේ.
කරෙයිනගර් ධීවරයින් ප්‍රකාශ කොට සිටියේ එම පුද්ගලයින් හය දෙනා කැෂුරිනා මුහුදු කලාපයේ සිටින ඉතා අධික විෂකින් සමන්විත මත්ස්‍යයින්ගේ ප්‍රහාරයකට ලක්ව ඇති බව තමන්ට විශ්වාසයෙන් යුතුව ප්‍රකාශ කළ හැකි බවයි.
මීට පෙර අවස්ථා කීපයකදී ද එවැනි ප්‍රහාරයන් එල්ල වූ අතර ධීවරයින් දෙදෙනෙකු විෂ මසුන්ගේ ප්‍රහාර නිසා මිය ගිය බවද කරෙයිනගර් ධීවරයෝ පවසා සිටියහ.
කරෙයිනගර් ප්‍රදේශයේ පිහිටා ඇති කැෂුරිනා මුහුදු වෙරළේ කසගස් විශාල ප්‍රමාණයක් පිහිටි නිසා එම වෙරළට කැෂුරිනා වෙරළ යනුවෙන් නම් තබා ඇති අතර යාපනයට යන දේශීය හා විදේශීය සංචාරකයින් එම මුහුදේ දිය නෑමට දැඩි ආශාවක් දක්වන්නේ ඉතාම නීල වර්ණයෙන් යුතු මුහුදු ජලය එහි ඇති නිසාය.
යාපනයේ ප්‍රධාන සංචාරක කලාපයට මෙම මුහුදු තීරයද ඇතුළත් වී තිබේ.
උතුරු පළාත් විශේෂ
රසුල දිල්හාර ගමගේ
