වැල්වැටිතුරෙයි ප්‍රදේශයට ඔබ්බෙන්වූ මුහුදු තීරයේදී පෙරේදා (27) අනවසර ධීවර කටයුතු සිදු කළ ඉන්දීය ධීවර යාත්‍රාවක් සමඟ ඉන්දීය ධීවරයන් 13ක් නාවික හමුදා භාරයට ගැනීමට යාමේදී එම ධීවරයන් කලහකාරී ලෙස හැසිරී නාවික හමුදා සාමාජිකයන්ගේ ගිනි අවි උදුරා ගැනීමට යාමේදී ඉන්දීය ධිවරයන් දෙදෙනෙකුට වෙඩි වැදී සුළු තුවාල සිදුව තිබේ. යාපනය වැල්වැටිතුරෙයි ප්‍රදේශයට ඔබ්බෙන්වූ ශ්‍රී ලංකාවට අයත් මුහුදු සීමාව තුළට ඇතුළුවී අනවසර ධීවර කටයුතු සිදු කළ ඉන්දීය ධීවර යාත්‍රා විශාල ප්‍රමාණයක් උතුරු නාවික විධානය මඟින් නිරීක්‍ෂණය කර, එම ධීවර යාත්‍රා මෙරට මුහුදු සීමාවෙන් ඉවත් කිරීමේ විශේෂ මෙහෙයුමක් එම විධානයට අයත් නාවික හමුදා යාත්‍රා යොදවා සිදු කර තිබේ.
එහිදි නීති විරෝධී ධීවර කටයුතු මෙහෙයවමින් මත්ස්‍ය තොග රැස් කරමින් තවදුරටත් එම මුහුදු ප්‍රදේශයේ අනවසර ධීවර කටයුතු සිදු කරමින් රැඳී සිටි එක් ඉන්දීය ධීවර යාත්‍රාවක් සමඟ ඉන්දීය ධීවරයින් දහතුන්දෙනෙකු නාවික හමුදා භාරයට ගැනීමට කටයුතු කර ඇත.
නාවික හමුදාව වෙත පැවරී ඇති බලතල අනුව එම යාත්‍රාවට ගොඩවීමේදී එම ධීවරයින් පිරිස සමූහයක් ලෙස ආක්‍රමණශිලීව පහරදීමට තැත්කර නාවික හමුදා නිලධාරීන්ගේ ජීවිතයට අවදානමක් ඇති කරමින් නාවික හමුදා නිලධාරියකු සතුව තිබු ගිනි අවියක් උදුරා ගැනීමට උත්සහ කිරීමේදී එම ගිනි අවිය ක්‍රියාත්මකවීමෙන් ධීවරයන් දෙදෙනෙකු හට සුළු තුවාල සිදුව ඇති බව නාවික හමුදාව පවසයි.
නාවික හමුදාව විසින් එම ධීවරයින් දෙදෙනා වෙත මූලික ප්‍රථමාධාර ලබාදීමෙන් පසු, වැඩිදුර ප්‍රතිකාර සඳහා කඩිනමින් යාපනය ශික්‍ෂණ රෝහල වෙත ඇතුළත් කිරීමට කටයුතු කර ඇත. එම ධීවරයින්ගේ තත්වය බරපතළ නොවන බව යාපනය රෝහල මඟින් තහවුරු කර ඇති අතර නාවික හමුදාව විසින් සිද්ධිය සම්බන්ධයෙන් කන්කසන්තුරය පොලීසිය වෙත පැමිණිල්ලක් ද සිදු කර තිබේ.
ඉදිරි නිතීමය කටයුතු සඳහා ඔවුන් යාපනය මයිලඩි ධීවර පරීක්‍ෂක කාර්යාලය වෙත භාරදීමට නියමිතව තිබුණි.
රක්ෂණ ශ්‍රියන්ත
