ශ්‍රී ලංකා මහවැලි අධිකාරිය මඟින් සංවිධානය කරන Òමහවැලි පුනරුද සතියÓ විශේෂ සංවර්ධන වැඩසටහනෙහි තෙවැනි දිනය වන අද (29) ‘කෘෂිකර්ම දිනය’ ලෙස නම් කර තිබේ.
මහවැලි H කලාපය තුළ පැවැත්වෙන මෙම සංවර්ධන වැඩසටහන යටතේ කෘෂිකර්ම දිනය අර්ථවත් කරමින් ගල්නෑව කොට්ඨාසයේ ලොකු ලූනු සත්‍ය බීජ නිෂ්පාදන ආශ්‍රිත පුහුණු වැඩසටහන, කිරිගව පාලනය සඳහා වූ නවීණ තාක්ෂණය ගොවීන්ට හඳුන්වා දීම, පොල් වගාවේ රෝග හඳුනාගැනීම, ආරක්ෂිත ගෘහ තුළ ශාක පෝෂක කළමනාකරණය, මඩපොකුණු කොන්ක්‍රීට් ආස්තරණය කිරීම සිදු කිරීමට කියමිතය.
නොච්චියාගම කොට්ඨාසය තුළ කුකුල් පාලනය පිළිබඳව දැනුවත් කිරීමේ වැඩසටහන්, ගෙවතුවල බඳුන්ගත මිරිස් වගාව හඳුන්වාදීම, වී වගාව ක්‍රමවත්ව කිරීම පිළිබඳව දැනුම්වත් කිරීමේ වැඩසටහන්, වල් නාශක පිළිබඳව ජනතාව දැනුම්වත් කිරීම්, කෘමිනාශක භාවිත කිරීම ක්‍රමවත් කිරීම පිළිබඳව දැනුම්වත් කිරීම්, රුක් රෝපණ වැඩසටහන් පැවැත්වීමට සැලසුම් කර ඇත.
මහඉලුප්පල්ලම කොට්ඨාසයේ දී මහවැලි පුනරුද සතිය – කෘෂිකර්ම දිනය සමරමින් පොල්වගා පුහුණු වැඩසටහන්, වී වගාවේ ශාක පෝෂණ කළමනාකරණය, පලතුරු කප්පාදු වැඩසටහන සහ කිරිගව පාලනය පිළිබඳව වැඩසටහන් පැවැත්වීමට කටයුතු යොදා තිබේ. තඹුත්තේගම කොට්ඨාසයේ ගෘහ ආශ්‍රිත වගාවන් පිළිබඳව සහ ඒකාබද්ධ කෘෂිකර්ම කළමනාකරණය පිළිබඳව දැනුම්වත් කිරීම, වී වගාවේ ක්ෂේත්‍ර පාසල් වැඩසටහනට සමගාමීව භෝග සායනයක් පැවැත්වීම සහ කුකුළු කෑම නිෂ්පාදනය පිළිබඳව පුහුණු වැඩසටහනක් පැවැත්වීම සිදු කෙරේ. එප්පාවල කොට්ටාසයේදී අතිරේක භෝග වගාවේ රෝග පළිබෝධ පාලනය, ගෙවතු වගා සංවර්ධන වැඩසටහන්, කිරිගව පාලනයේ තෘණ ස්ථාපනය කිරීමේ වැඩසටහන්, කුකුළු පාලනයේ රෝග හඳුනා ගැනීම සහ විසිතුරු මත්ස්‍ය වගාවේ ගැටලු පිළිබඳව සාකච්ඡා වැඩසටහනක් ද පැවැත්වීමට කටයුතු යොදා ඇත.
මීගලෑව කොට්ඨාසයේදී කෘෂි මාර්ග පිළිසකර කිරීම, ප්‍රජා සහභාගිත්ව වැඩසටහන්, පලතුරු පැළ බෙදාදීම සහ ගෙවතු වගා වැඩසටහන් පැවැත්වීම අද (29) දින සිදු කෙරේ. තලාව කොට්ඨාසයේ සයිලේජ නිෂ්පාදන වැඩසටහන්, රුක්රෝපණ වැඩසටහන් පැවැත්වීමට නියමිතය. Òමහවැලි පුනරුද සතියÓ පෙබරවාරි 02 දා දක්වා පැවැත්වේ.
බුද්ධිකා ඉඹුලාන
