පාස්කු ඉරුදින එල්ලවූ ත්‍රස්ත ප්‍රහාරය සම්බන්ධයෙන් කොටුව මහේස්ත්‍රාත් අධිකරණයේ පෙනී සිටින ලෙස නියෝග කරමින් නිකුත් කළ සිතාසිය බලරහිත කරන ලෙස ඉල්ලා හිටපු ජනාධිපති මෛත්‍රීපාල සිරිසේන මහතා ඉදිරිපත් කළ රිට් පෙත්සම නව විනිසුරු මඬුල්ලක් හමුවේ ලබන පෙබරවාරි මස 06 වැනිදා විභාගයට ගැනීමට අභියාචනාධිකරණය ඊයේ (28) තීරණය කළේය.
මෙම පෙත්සම විභාගයට ගනු ලැබූ විනිසුරු මඬුල්ලේ සාමාජිකයන් කිහිප දෙනෙකු ශ්‍රේෂ්ඨාධිකරණ විනිසුරුවරුන් ලෙස උසස් වීම් ලැබීම හේතුවෙන් පෙත්සම විභාග කිරීමට නව විනිසුරු මඬුල්ලක් පත් කිරීමට තීරණය කෙරිණ.
ධම්මික ගනේපොල සහ දමිත් තොටවත්ත යන අභියාචනාධිකරණ විනිසුරු මඬුල්ල හමුවේ මෙම අදාළ පෙත්සම කැඳවූ අවස්ථාවේදී මේ බව තීරණය කෙරිණි.
පාස්කු දින සිදු වූ ත්‍රස්ත ප්‍රහාරය සම්බන්ධයෙන් සිරිල් ගාමිණී පියතුමා සහ එම ත්‍රස්ත ප්‍රහාරයට ලක්ව තුවාල ලැබූ ජේසුරාජ් ගනේෂන් විසින් කොටුව මහේස්ත්‍රාත් අධිකරණය හමුවේ පෞද්ගලික පැමිණිල්ලක් ඉදිරිපත් කර තිබුණි.
එම සිද්ධිය සම්බන්ධයෙන් හිටපු ජනාධිපතිවරයා අපරාධ චෝදනා යටතේ සැකකරුවකු ලෙස නම් කරන ලෙස එමඟින් ඉල්ලා තිබුණි.
එම පැමිණිල්ල සලකා බැලූ කොටුව මහේස්ත්‍රාත් තිළිණ ගමගේ මහතා අදාළ පැමිණිල්ල සම්බන්ධයෙන් කොටුව මහේස්ත්‍රාත් අධිකරණය හමුවේ ඉකුත් ඔක්තෝබර් මස 14 වැනිදා පෙනී සිටින ලෙස හිටපු ජනාධිපති මෛත්‍රීපාල සිරිසේන මහතාට නියෝග කරමින් සිතාසියක් නිකුත් කළේය. එම සිතාසිය අත්හිටුවන ඉල්ලා හිටපු ජනාධිපතිවරයා මෙම රිට් පෙත්සම අභියාචනාධිකරණයට ගොනු කළේ ඉන් අනතුරුවය. මීට පෙර මෙම පෙත්සම සම්බන්ධයෙන් මූලික කරුණු සලකා බැලූ අභියාචනාධිකරණය පසුගිය වසරේ ඔක්තෝබර් මස 14 වැනිදා එය විභාගයට ගැනීමට තීරණය කළේය.
පාස්කු දින සිදු වූ ත්‍රස්ත ප්‍රහාරය වලක්වා නොගැනීම සම්බන්ධයෙන්
හිටපු ජනාධිපති මෛත්‍රීපාල සිරිසේන මහතාට එරෙහිව අපරාධ චෝදනා මත සිදු කර ඇති පැමිණිල්ල විභාගයට ගැනීම සති දහයකට කල් තබන ලෙස අභියාචනාධිකරණය එදින කොටුව මහේස්ත්‍රාත් තිළිණ ගමගේ මහතාට නියෝග කළේය.
එම කාලය තුළ හිටපු ජනාධිපතිවරයාට අගතියක් වන ආකාරයේ නියෝග දීමෙන් වළකින ලෙසද නියම කෙරිණ. අනතුරුව මෙම පෙත්සම පූර්ණ විනිසුරු මඬුල්ලක් හමුවේ සලකා බලන ලෙස ඉල්ලා අභියාචනාධිකරණයට මෝසමක් ඉදිරිපත් කර තිබුණි.
කොටුව මහේස්ත්‍රාත් අධිකරණයට පුද්ගලික පැමිණිල්ල ඉදිරිපත් කළ පාර්ශ්වය විසින් මෙම මෝසම ඉදිරිපත් කරන ලදී. ආරක්ෂක ඇමැතිවරයා ලෙස වගකීම් පැහැර හැරීම ඇතුළු හිටපු ජනාධිපතිවරයාට එරෙහිව ඇති චෝදනාවල බරපතළකම සහ එම අපරාධමය සිද්ධිය සම්බන්ධයෙන් ජනතාවට ඇති වැදගත්කම සලකා බලා ආණ්ඩුක්‍රම ව්‍යවස්ථාවේ 146 වන විධිවිධානය අනුව මෙම පෙත්සම පූර්ණ විනිසුරු මඬුල්ලක් හමුවේ සලකා බලන ලෙස එමඟින් ඉල්ලා තිබුණි. එම මෝසම සම්බන්ධයෙන් කරුණු සලකා බැලූ අභියාචනාධිකරණ සභාපති විනිසුරුවරයා අදාළ පෙත්සම විභාග කිරීම සඳහා පංච පුද්ගල විනිසුරු මඬුල්ලක් නම් කිරීමට තීරණය කළේය.
ඒ අනුව පත් කළ විනිසුරු මඬුල්ලේ සාමාජිකයන් වූ සෝභිත රාජකරුණා, මේනකා විජේසුන්දර සහ සම්පත් අබේකෝන් යන මහත්ම මහත්මීන් ශ්‍රේෂ්ඨාධිකරණ විනිසුරුවරුන් ලෙස පසුගිය දා උසස් කරන ලදි. මහේස්ත්‍රාත් අධිකරණයේ පෙනී සිටින ලෙස දන්වා තමන්ට නිකුත් කර තිබෙන සිතාසිය බලරහිත කරන සර්ටියෝරාරි රිට් ආඥාවක් නිකුත් කරන ලෙස හිටපු ජනාධිපතිවරයා මෙම පෙත්සම මඟින් අභියාචනාධිකරණයෙන් ඉල්ලා සිටියි.
එසේම තමන්ට එරෙහිව කොටුව මහේස්ත්‍රාත් අධිකරණය හමුවේ පැවැත්වෙන නඩු විභාගය අත්හිටුවන අතුරු නියෝගයක් නිකුත් කරන ලෙසත් ඔහු පෙත්සම මඟින් ඉල්ලා ඇත.
කොළඹ කොටුව මහේස්ත්‍රාත්වරයා සහ එම අධිකරණයේ රෙජිස්ට්‍රාර්වරයා මෙහි වගඋත්තරකරුවෝ වෙති.
නෙල්කා මැදගෙදර
