කුරුණෑගල අමුණවත්ත පාලම දැඩි ලෙස අබලන්ව ඇති බවත් විකල්ප විසඳුමක් ලෙස “පාලම අබලන් බර වාහන ධාවනය තහනම් විකල්ප මාර්ග භාවිත කරන්න” යනුවෙන් පළාත් මාර්ග සංවර්ධන දෙපාර්තමේන්තුව විසින් ද පාලමේ යට දිරාපත්වී ඇති ඡායාරූප සහිතව “පාලම අබලන්වී ඇත” යනුවෙන් ගම්වාසීන් විසින් ද පුවරු ප්‍රදර්ශනය කර ඇතත් වැලි ලොරි සහ බරවාහන ධාවනය වන බවත් කුමන හෝ අවස්ථාවක පාසල් දරුවන් සමඟ බස් රථයක් වුවත් අනතුරකට ලක්වීමට ඉඩකඩ ඇති බවත් ප්‍රදේශවාසීහු පවසති.
කුරුණෑගල අමුණුවත්ත පාලම මතින් දිනකට රථ වාහන 1000කට ආසන්න සංඛ්‍යාවක් ගමන් කරන විශාල පිරිසක් භාවිත කරන මෙම පාලමේ දැනට කොන්ක්‍රීට් කඩාවැටී යකඩ කම්බි මතුවී දිරාපත් වී ඇති බවත් පසුගිය මැතිවරණ සමයේ පාලම අලුත්වැඩියාව සඳහා මැනුම් කටයුතු ආදිය සිදු කළ අතර මැතිවරණ නීතිරීති මුවාවෙන් වැඩ කටයුතු යටපත් කළ බවත් ප්‍රදේශවාසීහු පෙන්වා දෙති.
මෙම මාර්ගය කාපට් අතුරා මනා නිමාවකින් පිළිසකර කර ඇති වුවත් පාලම පිළිසකර නොකිරීම පිළිබඳව අමුණවත්ත, හේනමුල්ල, ජයන්තිපුර, තල්කොට නයිලිය කටුපිටිය යන ගම්වල ජනතාව මැසිවිලි නඟති.
නව රජයේ ‘ක්ලීන් ශ්‍රී ලංකා’ වැඩසටහන යටතේ හෝ මෙම පාලම අලුත්වැඩියා කිරීම සඳහා වයඹ ආණ්ඩුකාර තිස්ස වර්ණසූරිය මහතාගේ අවධානය යොමු වේවායි ප්‍රදේශවාසීහු ප්‍රාර්ථනා කරති.
මාවතගම – ආනන්ද විජේතිලක
