කොස්ලන්ද පූනාගල මාර්ගයේ නිවෙසක ඊයේ (27) අලුයම හටගත් ගින්නකින් නිවෙස තුළ නිදා සිටි පුද්ගලයකු පිලිස්සී මියගොස් ඇතැයි කොස්ලන්ද පොලීසිය පැවසීය.
මෙසේ මියගොස් ඇත්තේ කොස්ලන්ද, පූනාගල පාරේ පදිංචිව සිටි එන්.බී. සයිමන් සිල්වා (73) නමැති පුද්ගලයෙකි. මොහු අහංගම ප්‍රදේශයේ සිට මීට කලකට ඉහතදී කොස්ලන්දට පැමිණ කොස්ලන්ද පූනාගල මාර්ගයේ කුඩා නිවෙසක තනිව පදිංචිව සිටිමින් වෙළෙඳාම් කටයුතු සිදු කර ඇති බව පොලීසිය සඳහන් කළේය. මෙම නිවෙසේ ඊයේ (27) අලුයම ගින්නක් හටගෙන ඇති බවට පොලීසියට ලැබුණු තොරතුරක් මත කොස්ලන්ද පොලීසියේ නිලධාරින් වහා ගොස් වතුර ගසමින් පැතිර යමින් තිබූ ගින්න නිවා දැමීමට කටයුතු කළද ඒ වන විටත් නිවෙස තුළ සිටි මෙම පුද්ගලයා පිලිස්සී මියගොස් සිට ඇත. ගින්නට හේතුව මෙතෙක් අනාවරණය වී නොමැත. නිවෙස අසල මේ වන විටත් පොලිස් ආරක‍්ෂාව යොදා ඇති අතර, මහේස්ත්‍රාත් පරීක්ෂණය සිදු කිරීමට නියමිතය.
සොරණාතොට සමූහ – සී. ගමගේ
බදුල්ල – නිශාන්ත අබේගුණවර්ධන
