ආනයන බලපත්‍ර නොමැතිව මෙරටට සහල් ආනයනයට දුන් අවසරයට අනුව පෞද්ගලික ආනයනකරුවන් ගෙන් වූ සහල්වලින් ශ්‍රී ලංකා රේගුව රුපියල් කෝටි 1,090ක් ආනයන බදු අය කර ගෙන තිබේ. අවසර දී තිබූ කාලයේ සහල් මෙට්‍රික් ටොන් 167,000ක් මෙරටට ගෙන්වා තිබූ බවත්, එම සහල් තොගය වෙනුවෙන් මෙම බදු අය කර ගත් බවත් රේගු මාධ්‍ය ප්‍රකාශක, අතිරේක රේගු අධ්‍යක්ෂ ජනරාල් සීවලී අරුක්ගොඩ මහතා පැවැසීය.
එම සහල් මෙට්‍රික්ටොන් 167,000ක් තුළ කැකුළු සහල් මෙට්‍රික්ටොන් 66,000ක් සහ නාඩු සහල් මෙට්‍රික්ටොන් 101,000ක් ඇතුළත් වූ බවත් එම සහල් කිලෝවක් වෙනුවෙන් රුපියල් 65 බැගින් ආනයන බදු අය කළ බවත් අරුක්ගොඩ මහතා පැවැසීය. ඒ අනුව සහල් මෙට්‍රික්ටොන් එකකට ඩොලර් 220ක් හෙවත් රුපියල් 65,000ක පමණ බද්දක් අය කළ බවද අරුක්ගොඩ මහතා කීවේය.
පසුගිය වසරේ දෙසැම්බර් 4 වැනිදා ආනයන බලපත්‍ර නොමැතිව සහල් ආනයනය කිරීමට අවසර දී තිබූ අතර මෙම මස 10 වැනිදා දක්වා එය දීර්ඝ කර තිබිණි.
සහල් ආනයනය කර තිබුණේ සියයට 90කට වැඩි ප්‍රමාණයක් පෞද්ගලික අංශයේ ආනයනකරුවන් වේ. රාජ්‍ය වාණිජ නීතිගත සංස්ථාව රජය වෙනුවෙන් සහල් මෙට්‍රික් ටොන් 4,000ක් ආනයනය කර තිබිණි.
සුභාෂිණී සේනානායක
