අල්ලස් හෝ දූෂණ චෝදනා විමර්ශන කොමිෂන් සභාවට 2023 වර්ෂයේ ඉදිරිපත් කර ඇති පැමිණිලිවලින් සියයට 49ක්ම කොමිෂන් සභා පනතට අදාළ පැමිණිලි හෝ ප්‍රමාණවත් කරුණු ඉදිරිපත් නොකරන ලද පැමිණිලි බව ජාතික විගණන කාර්යාලය අල්ලස් හෝ දූෂණ චෝදනා විමර්ශන කොමිෂන් සභාව සම්බන්ධයෙන් නිකුත් කළ විගණන වාර්තාවක දැක්වෙයි. 2023 වර්ෂයේදී කොමිෂන් සභාව වෙත පැමිණිලි 3,431ක් ලැබී තිබුණු අතර, ඉන් පැමිණිලි 2,789ක් පැමිණිලි කමිටුව වෙත ඉදිරිපත් කර තිබිණි.
පැමිණිලි කමිටුවට ඉදිරිපත් කළ පැමිණිලිවලින් වැඩි ප්‍රමාණයක් කරුණු ඉදිරිපත් කර නොතිබීම සහ අල්ලස් පනතට අදාළ නොවීම හේතුවෙන් තවදුරටත් කටයුතු නොකිරීමට නියෝග කළ පැමිණිලි සංඛ්‍යාව 766කි.
කොමිෂන් සභා පනතට අදාළ නොවීම හේතුවෙන් ඉදිරි කටයුතු සඳහා වෙනත් ආයතන වෙත ඉදිරිපත් කරන ලද පැමිණිලි සංඛ්‍යාව 613 කි. ඒ අනුව පැමිණිලි කමිටුව වෙත ඉදිරිපත් කරන ලද පැමිණිලිවලින් සියයට 49ක් කොමිෂන් සභා පනතට අදාළ පැමිණිලි හෝ ප්‍රමාණවත් කරුණු ඉදිරිපත් නොකරන ලද පැමිණිලි බව ද එහි සඳහන් වේ.
රන්මලී සෝමසිරි
