අන්තර් සමාජ පළමු පෙළ ක්‍රිකට් තරග දිවියේ කඩුලු 950 සීමාව පසුකිරීමට බීආර්සී කණ්ඩායමේ නායක දඟ පන්දු යවන ක්‍රීඩක මාලින්ද පුෂ්පකුමාර සමත් වෙයි.
අන්තර් සමාජ පළමු පෙළ තුන්දින ක්‍රිකට් තරගාවලිය යටතේ පසුගියදා කොළඹ එස්එස්සී පිටියේදී සත්කාරකයන්ට එරෙහිව ආරම්භ වූ තරගයේ පළමු ඉනිමේදී එස්එස්සී ආරම්භක පිතිකරු ෂෙවෝන් ඩැනියෙල් දවා ගැනීමත් සමඟ මේ සීමාවට පිවිසි මාලින්ද එම ඉනිමේදී තවත් කඩුලු 6ක් දවා ගැනීමට සමත් විය. ඒ අනුව ලකුණු 35කට කඩුලු 7ක් බිඳ දැමූ ඔහු ඉන් නොනැවතී එස්එස්සී දෙවැනි ඉනිමේදී තවත් කඩුලු 6ක් බිඳ දැමීමට සමත් විය.
මෙය ඔහු පළමු පෙළ තරගයක කඩුලු 10ක් හෝ ඊට වැඩියෙන් දවාගත් 27 වැනි අවස්ථාව ලෙස සටහන් විය.
37 හැවිරිදි මාලින්ද 2006 වසරේ පළමු පෙළ පිටියට පිවිසි අතර, ඔහු ක්‍රීඩා කළ 165 වැනි පළමු පෙළ තරගය මෙය විය. මේ තරගය නිමා වන විට ඔහු දවාගෙන ඇති පළමු පෙළ කඩුලු සංඛ්‍යාව 962ක් ලෙස වාර්තා විය. මෙරට පළමු පෙළ තරග බිමේ සිවුවැනි වැඩිම කඩුලුලාභියා ද වන්නේ මාලින්දය. ලොව වැඩිම ටෙස්ට් කඩුලුලාභියා වන මුත්තයියා මුරලිදරන් කඩුලුලාභීන් අතර පෙරමුණ ගෙන සිටින්නේ පළමු පෙළ කඩුලු 1374ක් දවා ගනිමිනි. රංගන හේරත් කඩුලු 1080ක් සමඟ එහි දෙවැනි තැන පසුවන අතර, දිනුක් හෙට්ටිආරච්චි කඩුලු 1000ක් දවා ගැනීමට සමත්ව තිබේ.
2017 වසරේ ජාත්‍යන්තර තරග වරම් ලබාගත් මාලින්ද මේ වනවිට ක්‍රීඩා කර ඇත්තේ ජගත් එක්දින තරග 2ක් සහ ටෙස්ට් තරග 4කට පමණි.
නිරෝෂාන් ප්‍රියංකර
